Бүгүн көк бөрү боюнча мелдештин финалында "Ынтымак" менен "Достук" командалары беттешет

Бүгүн, 21-мартта Бишкек шаарындагы "Аккула" ат майданында Нооруз майрамына карата көк бөрү боюнча республикалык мелдештин финалы орун алат. Анда Таластын "Ынтымак" командасы менен Оштун "Достук" командаларынын беттеши өтмөкчү.

Нооруз майрамына карата уюштурулган мелдеш 15-мартта жарым чейрек финалдык баскычтан старт алган. Жалпы эсепте бул мелдешке 16 команда катышып, олимпиадалык система боюнча күч сынашкан.

"Ынтымак" командасы мелдештин жүрүшүндө алгач "Келечек командасын жеңип, чейрек финалда "Толкун" командасын утуп, жарым финалда Чүйдүн "Биримдик Аю" командасынын үстүнөн жеңишке жеткен.

Ал эми Оштун "Достук" командасы алгачкы беттеште "Эмгек Талаа" командасын утуп, чейрек финалда "Көк-Жал" командасынын үстүнөн жеңишке жетип, жарым финалда Чүйдүн "Арашан" командасын жеңип алган.

Ошондой эле бүгүн 3-орун үчүн беттеш орун алат, анда "Биримдик Аю" "Арашан" командасы менен күч сынашмакчы.

Эске салсак, 2017-жылы Нооруз майрамына карата өткөн мелдештин финалында "Ынтымак" менен "Достук" беттешкен. Анда бүйүр кызыткан беттештин жыйынтыгында "Ынтымак" 8:7 эсебинде жеңишти илип кеткен. Бул жылы жеңишке кайсы команда жетерин бүгүнкү беттеш аныктайт.

21-мартта өтө турган беттештер:

3-орун үчүн:

Саат 10:00дө "Биримдик Аю" - "Арашан"

1-орун үчүн:

14:00дө "Ынтымак" - "Достук".