Ырчы Жумагүл Раимжан кызынын Бишкектеги алгачкы концертинде зал 90 пайызга толду

Жумагүл Раимжан кызынын апасы

Бүгүн, 10-апрелде Токтогул Сатылганов атындагы Кыргыз улуттук филармониясында ырчы Жумагүл Раимжан кызынын "Оорусаңыз таарынам" аттуу жеке концерти өттү. Буга чейин Ош шаарында бир нече ирет концерт берген ырчы Бишкекте алгачкы жолу чыгармачылык кечесин өткөрдү.

"Борбор калаада концерт берүү үчүн толук 1 ай даярдандым. Атайын дизайнерлер менен иштешип, 5 көйнөк тиктирдим. Эмгектин акыбети кайтып, куттуу сахнада концертим ийгиликтүү башталды. Менин чыгармачылыгымды колдоп келген сахналаш досторума жана жалпы күйөрмандарыма ыраазычылыгымды билдирем", - деди Раимжан кызы.

Салтанаттуу кеченин 70 пайызы жандуу үн менен коштолду. Алып баруучулук кызматты Чыңгыз Мырзаев жана Нурзат Токтосунова аркалашты. Жумагүл Раимжан кызын куттуктап, ырчылар Кенже Дүйшеева, Гүлжигит Калыков, Омар жана Анжелика келип, ыр-белектерин тартуулашты.

Кеченин жүрүшүндө Жогорку Кеңештин депутаты Алиярбек Абжалиев, "Кара-Суу" коомунун жаштар комитетинин төрагасы Айбек Осмонов сахнага чыгып, Жумагүл Раимжан кызынын Бишкектеги алгачкы концерти менен куттукташты. Алар маданият тармагына кошкон салымы үчүн ырчыга Кыргыз Республикасынын Жогорку Кеңешинин ыраазычылык катын жана акчалай белектерин беришти.

Концертке келген көрүүчүлөр залдын 90 пайызын түзүп, кече 2 саатка созулду.