Ноокаттагы окуя. Жуучусу кайтарылган баланын кызганычы 3 баланы атасынан ажыраткан

Ноокат районуна караштуу Гулистан айылынын айрым тургундарынын колунан каза болгон 32 жаштагы адам кызга жолугуу үчүн эмес, ал кызды коркуткан адамдар менен сүйлөшүү үчүн барган. Бул тууралуу Ош ОИИБинин басма сөз катчысы Жеңиш Ашырбаев билдирди.

"Ноокаттын Бостон айыл аймагындагы Гулистан айылында жашаган үй-бүлөнүн 17 жаштагы Райхон (аты редакция тарабынан өзгөртүлдү) аттуу кызына ошол эле айылдын тургуну үйлөнүү максатында жуучу жиберет. Апасы кызынын жаш курагы жете элек экенин айтып, макул болгон эмес. Буга нааразы болгон жигит кызды ар кандай жолдор менен коркута баштайт. Кыздын атасы жок болгондуктан ал үй-бүлөнүн ар кандай маселелерин чечүүдө жардамдашып жүргөн 32 жаштагы Ноокат районунун борборунда турган Музафар (аты өзгөртүлдү) 29-мартта ал бала менен сүйлөшүү үчүн келет. Ал Бостон айылынын тургундары менен тил табыша албай, алардын ур-токмогуна кабылган. Алган жаракаты оор болгондуктан 5-апрелде ооруканада каза болгон, анын артында 3 баласы жетим калды", - дейт Ашырбаев.

Ошондой эле 30-мартта тургундардын ур-токмогуна кабылган Розумухамад аттуу дагы бир жигит Райхон менен сиңдисин унаасы менен тууганынын үйүнө жеткирүү үчүн келгенин SUPER.KG порталына кабарлаган болчу. Ал да ачуулуу балдардын ур-токмогуна кабылып, бирок оор жаракат алган эмес.

Ошондой эле "Райхон бир учурда бир нече эркектер менен жолугуп жүргөн, сабалган эки адам ошолордун катарын толуктагандардан" деген да маалыматтар тараган болчу. Бирок бул маалыматтарды Ош ОИИБинин басма сөз катчысы Жеңиш Ашырбаев төгүндөдү.

"Жабырлануучу кыз маркум Музафар менен интимдик мамиледе болуп жүргөн. Андан сырткары да башка балдар менен да мамиледе болгон. Ошон үчүн сабалды" деген маалыматтар - калп. Анткени ушул сыяктуу ушактардан улам экспертиза дайындалган. Анын жыйынтыгы менен кыздын абийири таза экени аныкталды. Бул жерде жуучусу кайтарылган баланын кызганычы айылдаштары менен бирге ушул жорукка түрткөн", - дейт Ашырбаев.

Ошондой эле басма сөз катчы аталган окуяга байланыштуу укуктук баа бериле баштаганын, 32 жаштагы Музафардын өлүмүнө шектүү деп эки адам кармалганын айтты. Кылмышка шектүү катары 19 жана 21 жаштагы 2 адам 31-мартта кармалган. Алгач шектүүлөргө бейбаштык беренеси менен айып тагылган. Кийин сабалган 32 жаштагы Музафар каза болуп калгандыктан шектүүлөргө карата Кылмыш-жаза кодексинин 104-беренеси (саламаттыкка атайылап оор залал келтирүү) менен кылмыш иши козголгон. Алар эки айга камакка алынып, тергөө амалдары жүргүзүлүп жатат.

Ал эми Розумухамаддын сабалышы боюнча Кылмыш-жаза кодексинин 234-беренеси (бейбаштык) менен кылмыш иши козголуп, тергөө иштери улантылууда. Кылмышка шектүү катары 15 адам кармалган. 9-апрелде Ош шаардык соту кармалган 15 адамдын баш коргоо чарасын карап, алардын он экисин эки айга камакка алса, үчөө үй камагына чыгарылган.