ИИМдин биринчи орун басары Тогуз-Тородогу 12 адамдын камалышына Жалал-Абад ОИИБинин жетекчилерин күнөөлөдү. Бул тууралуу Ички иштер министрлигинин басма сөз кызматынан билдиришти.
Маалыматка ылайык, ИИМдин биринчи орун басары Сүйүнбек Өмүрзаков Жалал-Абад ОИИБинин жаңы дайындалган башчысын тааныштырып жатып, Тогуз-Тородогу алтын ылгоочу комбинаттын өрттөлүшүнө шектелип кармалган 12 жарандын камалышына Жалал-Абад ОИИБинин өздүк курамынын жетекчилерин күнөөлөгөн.
"Жалал-Абад облусунда 3 ай ичинде катталган кылмыштардын саны өткөн жылдын отчётуна салыштырмалуу 159 фактыга өскөн. Былтыр 589 болсо, быйыл 748ге жеткен.
Тогуз-Тородогу окуя боюнча силердин алдын ала маалыматыңар жок болгондугунун натыйжасында ушул окуя келип чыкты. Жетекчиликке, жергиликтүү бийлик өкүлдөрүнө, губернаторго ыкчам маалыматтарды, элдин пикирин, нааразычылыгын өз убагында билдирген эмессиңер. Учурда 15 жаранга кылмыш иши козголуп, 12 адам тергөө абагына киргизилди. Негизинен ушунун баарын алдын алуу керек болчу. Ушундай терс көрүнүштөгү фактылардын катталышына жетекчилер, силер күнөөлүсүңөр! Силердин өз ишиңерге болгон кайдыгерлигиңер менен функционалдык милдетиңерди толук аткарбаганыңар ушундан билинип калды. Элдин нааразычылыгы министрликке дагы жетти. Бул аймактык ички иштер органдарынын жетекчилери жергиликтүү тургундардын көйгөйлөрүн чече албагандыгын билдирди", - деген Өмүрзаков.
Жалал-Абад ОИИБинин ыкчам-кызматтык ишмердүүлүгүндөгү кемчиликтер менен аталган окуя боюнча иликтөөнүн жыйынтыгы ИИМдин кезектеги ыкчам кеңешмесинде да караларын кошумчалаган.
