Ырчы Руслан Абылов концертинде "Кыргыздын мыкты жигити" наамы менен сыйланды

Бүгүн, 5-майда ырчы Руслан Абылов Каба уулу Кожомкул атындагы спорт сарайында тушоо кесүү концертин өткөрдү. Бишкектеги алгачкы концертине толук 2 ай даярданган ырчы эл алдына чыгар астында толкунданды.

"Сахнада жүргөнүмө билинбей эле 5 жыл болуптур. Алгачкы отчёттук концертим болгондуктан абдан толкунданып жатам. Тушоо кесүү концертиме атайын дизайнерлер иштешип 4 костюм тиктирдим. Ага 80-90 миң сомдой акча кетти. Ал эми сахнаны жасалгалоо үчүн 300 миң сом короттум", - дейт Абылов.

Концертин ачылышында Руслан Абылов сулуу бийчилердин коштоосунда сахнага чыгып, репертуарындагы "Дария", "Башка жанга чалба" жана башка чыгармаларын аткарды. Ырчынын алгачкы жеке концерти менен куттуктап Кыргыз Республикасынын Эмгек сиңирген артисти Динара Акулова, ырчылар Нурмат Садыров, Султан Садыралиев келип, ыр-белектерин тартуулашты.

Концерттин жүрүшүндө Руслан Абылов чыгармачылыгына чоң салымын кошкон Добрга ыраазычылыгын айтып, экөө биргеликте "Бийкеч" аттуу ырын ырдашты. Бул убакытка чейин эстрада жанрында ырдап жүргөн ырчы Бек Медетканов менен алгачкы жолу аккардеондун коштоосунда "Күлгүн жаш", "Жалгыздык" аттуу ырларды жандуу ырдашты. Соңунда продюсер Астра Исмаилова Руслан Абыловго Кыргыз Республикасынын "Асылзат" коомдук фондунун атынан "Кыргыздын мыкты жигити" деген сыйлык тапшырып, колуна күмүш саат такты.