Жогорку Сот Аида Салянованы 5 жылга эркинен ажыраткан өкүмдү күчүндө калтырды

Бүгүн, 22-майда Жогорку Сотто мурдагы депутат Аида Салянованын иши боюнча сот отуруму уланууда. Ишти Каныбек Бокоев, Арзыбек Акыев жана Болотбек Акматов кирген соттук коллегия карап, ага Каныбек Бокоев төрагалык кылып жатат.

14:05. Сот отуруму башталды. Отурум чакан бөлмөдө өтүп жаткандыктан Салянованын тарапташтары залга батпай коопсуздук кызматы менен тарапташтарынын ортосунда кайым айтышуу орун алды. Ошондо да сыртта батпай калган адамдар көп.

14:10. Сотто Аида Салянованын коомдук жактоочуларына сөз берилди. Алар Саляновага карата саясий басым жасалганын билдирип, аны актоо үчүн себептерди келтиришүүдө.

14:50. Коомдук жактоочу Рабига Сыдыкова сүйлөп жатат. Ал Салянованын ишин тергөөдө катачылыктар жана эске алынбаган иштер көп экенин айтты. Ошондой эле мурдагы баш прокурордун Алексей Елисеевдин жактоочулук лицензиясын узартпай коюуга укугу болгон эместигин белгиледи. "Эгер Салянова лицензияны узартуудан баш тартса, мыйзамга каршы келген кадамга барууга мажбур болмок", - деди Сыдыкова.

15:02. Коомдук жактоочу Рабига Сыдыкова райондук жана шаардык соттор чечим кабыл алып жатканда мыйзамсыз аракеттерди жасаганын айтты. "Биз сотторго далай жолу өтүнүчтөрдү келтирдик. Бирок өтүнүчтөрүбүз чечим чыгарылганда эске алынган жок, ишке тиркелген жок. Андан сырткары Салянованын укугу жактоочуларынын көзүнчө да тебеленип, отурумдарда басым көрсөтүлүп жатты. Биз бул процессте 13төн ашык ирет сотко ишенбөөчүлүк көрсөттүк. Мисалы, сот Касымбеков чечим чыгарарда Салянованын өзүнө да сөз берген жок", - деди Сыдыкова.

15:10. Коомдук жактоочу Рабига Сыдыкова Саляновага козголгон кылмыш иши толук саясий буйрук болгонун айтты. "Бул саясий буйрук менен козголгон иш. Бул нерсени тергөөчүлөрдүн аша чапкан аракеттери эле айтып турат. Алар да бул саясий буйрук экенин билип, ишти да чала тергешкен. Ошондой эле чала бойдон сотко өткөрүп беришкен", - деди Сыдыкова. Ошондой эле ал судья Касымбеков мыйзамга ылайык чечим чыгарбастан, ошол учурдагы саясий абалга жараша чечим чыгарганын айтты.

15:20. Коомдук жактоочу Рабига Сыдыкова УКМКнын айрым күбөлөрү жасалма экенин айтты. "Соттук материалдарда Алексей Елисеевдин Кыргыз жергесинде алган, Салянова узартып берген лицензия менен интернет-сайт ачып иштетип жатканы айтылат. Ал сайтты биз да ачып көрдүк, иштеген жок. Мындан тышкары иште тергөөчүлөрдүн күбөлөрү бар. Бирок биз аларды бир да жолу көргөн жокпуз. Сүйлөшүп биздин көзүбүзчө суракка алынышын каалаганбыз. Алардын аты-жөнү менен Мамлекеттик каттоо кызматына өтүнүч жөнөттүк эле, алар андай адамдар жок экенин билдирип жооп беришти. Ал паспорттору жок адамдарды тергөөчүлөр кантип күбө катары катташты? Андан сырткары алар УКМКнын имаратына кантип кирди деген суроо да пайда болот", - деди Сыдыкова.

16:00. Аида Салянова жарыш сөзүн баштады. "Мыйзам сакталган өлкөдө сыймыктануу менен жашаш керек" деген кеп бар. Ал эми биздин өлкөдө акыркы учурда мыйзам менен жашоо коркунучтуу болуп калды, айрыкча, ал бир адамдын көңүлүнө жакпаса коркунучтуу болуп калды", - деп баштады Салянова.

16:05. Аида Салянова: "Акыркы жылдары мага жана жакындарыма карата саясий куугунтук жүрүп, көө жабуу аракеттери өтө көп болду. Кеткен бийлик эмнеси менен мактана алат? Алар: 30-40тай камалган саясий атаандаштар, сөз эркиндиги чектелип куугунтукка кабылган айыпка жыгылган журналисттер, үй мүлктөрү камакка алынган жактоочулар менен "мактана алат". Ошондой эле өтө чоң коррупциялашкан 3-4 долбоор менен "мактана алат".

16:10. Аида Салянова соттук коллегияга жана сотко келгендерге кайрылып: "Мен сөзүмдү жыйынтыктап жатып силерди адилет чечим чыгарат деп ишенеримди айткым келди. Ошондой эле мени ушунча убакыт колдоп келген адамдарга ыраазычылык билдирем", - деп жарыш сөзүн жыйынтыктады.

16:15. Соттук коллегия кеңешме бөлмөсүнө кирип кетишти.

17:30. Соттук коллегия кеңешме бөлмөсүнөн сот залына кайтып келди.

17:36. Жогорку Сот Аида Салянова боюнча райондук соттун өкүмүн күчүндө калтырды.

Айта кетсек, Салянова "юстиция министри болуп турганда кылмыш жасаганы үчүн издөөдө жүргөн Алексей Елисеевдин адвокаттык лицензиясын узарткан" деп айыпталып, 2017-жылдын 10-октябрында Ленин райондук соту тарабынан күчөтүлгөн тартипте 5 жылга эркинен ажыратылган. Сот өкүмү анын наристеси 14 жашка толгондо, 2029-жылы күчүнө кирет. Салянованын кызы 2015-жылы 18-июлда төрөлгөн.

17:40. Аида Салянова: "Чечим менен макул эмеспиз. Биз актоо чечими чыгышы үчүн бардык мыйзамдуу аракеттерди көрөбүз. Алардын бири жаңы жагдайлардын ачылышы болот".

Жогорку Сот Аида Саляновага карата өкүмдү күчүндө калтырды (17:30-17:50)

Жогорку Сотто Аида Салянованын иши каралууда (14:00-16:15)