"Милиция үйүңө ууру кириптир деп чакыртып алып, үйүмө тинтүү жүргүздү" дейт Хизбут-Тахрир уюмуна тиешеси бар деп шектелип кармалган аял

7-июнда Оролбаевдердин үй-бүлөсү ИИМдин 10-бөлүмүнүн кызматкерлерине арызданып маалымат жыйын уюштурушту. Айтымдарында, алардын кызы Аптоокан Оролбаеванын үйүн милиция кызматкерлери негизсиз текшерген жана далили жок эле аны Хизбут-Тахрир уюмуна тиешеси бар деп жатышат.

Аптоокан Оролбаева китептер ага тиешеси жок экенин, андан коркутуу жолу менен көрсөтмө алышканын айтат.

"Талаада иштеп жүрсөм, аймактык тескөөчү "Үйүңө ууру кириптир, кел" деди. Келсем эле милициянын 10 кызматкери мени курчап алышты. Эшикти ачып бергенимде үйдүн ичинен 2 дептер менен дагы кагаздарды алып чыгып, "бул меники" деп кол кой деп коркутушту. Эмнеге кол койгонумду деле билбейм, болгону менин китептерим деген жазууну гана көрдүм", - дейт жабырлануучу Аптоокан Оролбаева.

Ал эми атасы Дүйшөнбек Оролбаев милиция кызматкерлери кызын кемсинткенин жана кызынын үйүн текшерерде эмне үчүн тинтүү жүргүзүлөрүн түшүндүрүшкөн эмес дейт.

"Иштеп жаткан жеринен "үйүңө ууру келди" деп алдап чакырып, 10 милиция кызматкери үйдү текшерүүгө алган. Эмне үчүн текшерип жатканын да айткан эмес. Силердин аты-жөнүңөрдү билели, өзүңөрдү тааныштыргыла десе "тааныштырдым, эми сага аялымдын да атын айтайынбы" дептир. Кызым ооруп үч күн ооруканага жатып калган. Анан муну террористсиң, хизбутсуң дешкен", - дейт Оролбаев.

Апасы Төркүнбү Оролбаева кызы Аптоокан ооруканадан дарыланып чыкканын айтат.

"Неврологияга алып бардык, ал жерден психологиялык бөлүмгө алып баргыла деди, психолог "мээси жабыркап калыптыр" деди. Үч күн дарыланып араң эсине келди. Аптоокан үч баласын өзү карайт. Эгер буга бир нерсе болуп калса, балдарын ким карайт?", - деди апасы.

Эжеси Турдукан Оролбаева үй-бүлөсү менен коркуп калганын айтат.

"Биз бир нерсе деп айтуудан коркобуз, сүйлөгөндөн да коркуп калдык. Аптоокан үйдөн деле эки жакка чыкпайт, анан бул кыздан кантип андай кагаздар чыксын", - дейт Турдукан Оролбаева.

Ал эми ИИМдин басма сөз катчысы Карима Аманкулова бул окуя боюнча кылмыш иши козголгонун айтат.

"19-майда Бишкек шаарындагы Алтын-Ордо жаңы конушунда 35 жаштагы Аптоокан Оролбаеванын үйүнө тинтүү жүргүзүлгөн. Натыйжада тыюу салынган 5 диний китеп табылган. Алар Хизбут-Тахрир-аль-Ислами, Ислам мамлекети жана дептерге колго жазылган Халифат мамлекетинин калыптануусу боюнча китептери, ошондой эле 2 журнал жана 2 блокнот алынган. Ошол эле күнү бул материалдар Биринчи Май районунун кылмыштарды каттоо китепчесине катталган.

Экспертизанын корутундусуна ылайык, 6-июнда табылган диний китептер тыюу салынган Хизбут-Тахрир-аль-Ислами диний уюмуна таандык экени аныкталган. Мындан улам бул факт боюнча 299-2-берене (улуттук, расалык, диний же аймактар аралык кастыкты козутуу иштерин уюштуруу) менен кылмыш иши козголду", - дейт Карима Аманкулова.

Айта кетсек, Жогорку Соттун 2003-жылдын 20-августундагы токтомуна ылайык, Хизбут-Тахрир-аль-Ислами диний уюмуна Кыргыз өлкөсүнүн аймагында ишмердүүлүгүн жүргүзүүгө тыюу салынган.