Арабиялык футбол күйөрманы Дүйнө чемпиондугуна велосипед менен келди

Футбол күйөрманы Дүйнө чемпиондугуна велосипед менен келди. Бул тууралуу чет элдик маалымат каражаттары жазып чыгышты.

Белгилүү болгондой, Сауд Арабия өлкөсүнүн жараны Фахад Ибрахимов Альяхья Санкт-Петербург шаарында орун алган Араб өлкөсүнүн курама командасынын ачык машыгуусуна катышты. Машыгууга катышуу үчүн ал 5 миңден ашуун чакырым жолду велосипед менен басып өткөн.

"Бул идея мага 20 жыл мурун келген. Мен өз өлкөмдүн курама командасын 1998-жылы Францияда өткөн Дүйнө чемпиондугуна барып колдогум келген. Минтип менин кыялым 2018-жылы ишке ашып отурат. Орусиянын аймагында велосипед менен жүрүү башка өлкөлөргө салыштырмалуу өтө ыңгайлуу болду. Бул өлкөгө үй-бүлөм менен келип, эс алып кетейин деген ойлор пайда болду", - деп билдирген Ибрахимов.

Күйөрман Орусияга жетиш үчүн Египет, Түркия, Грузия өлкөлөрүн басып өткөн. Ал Араб өлкөсүнүн Орусиядагы элчисине тапшыруу үчүн өлкөсүнүн желегин ала келген.

Айта кетсек, Орусия жана Сауд Арабия курама командаларынын беттеши 14-июнда Дүйнө чемпиондугунун алгачкы күнүндө орун алат.

Автор: Айзада Тураркулова