Чүйдө жол кырсыгынан беш адам каза болуп, 2 бала ооруканага жаткырылды

Чүй облусунда жол кырсыгы катталып, беш адам каза болду. Бул тууралуу Жол кыймылынын коопсуздугун камсыздоо башкармалыгынан билдирди.

Маалыматка ылайык, жол кырсыгы бүгүн, 24-июлда саат 08:15 чамасында катталган.

Ford Transit үлгүсүндөгү унаа Ивановка-Ак Сай унаа жолунда түштүктөн түндүктү көздөй бара жатып, ага каршы келе жаткан Toyota Camry унаасы менен сүзүшкөн. Кырсыктын кесепетинен Ford Transit унаасынын айдоочусу окуя болгон жерден каза болгон. Ал эми Toyota Camry машинасынын 34 жаштагы айдоочусу жана 3 жүргүнчүсү Ысык-Ата райондук ооруканасында көз жумушкан.

Ford Transit унаасынын айдоочусунун атасынын айтымында, уулу түнү бою талаадагы айдаган түшүмүн сугарып, эртең менен үйүнө келе жаткан.

Болжолдуу маалыматтар боюнча, Ford Transit унаасынын айдоочусу уктап кеткен. Учурда кырсык боюнча соттук-медициналык экспертизалар дайындалып, териштирүү иштери башталды.

Ал эми маалымат катчы бул унаа кырсыгы боюнча дагы да маалыматтар бериле тургандыгын жана азыркы учурда 2 бала ооруканада жатканын кошумчалады.