"Эч кандай баага сатылбайт". ПСЖ Килиан Мбаппени "Манчестер Юнайтедге" сатуудан баш тартты

Франциялык "Пари Сен-Жермен"(ПСЖ) клубу чабуулчусу Килиан Мбаппени англиялык "Манчестер Юнайтедге" сатуудан баш тартты. Бул тууралуу чет элдик басылмалар жазышууда.

Маалыматка караганда, ПСЖ Мбаппе үчүн кандай сумма сунушталса да сатылбай тургандыгын айткан.

Орусияда өткөн Дүйнө чемпиондугунан кийин эле "Манчестер Юнайтед" клубу ПСЖнын кеңсесине Мбаппени сатып алуу боюнча сунуш жиберген. Бирок француз клубу 19 жаштагы чемпионду берүүдөн баш тарткан.

Айрым маалыматтарга караганда, испаниялык "Реал Мадрид" клубу да аталган жаш оюнчуну сатып алуу ниетин билдирген. Бирок Мбаппе ПСЖдан кетүү планы жок экенин айткан.

Килиан Мбаппе өткөн сезондо ПСЖ менен 44 оюн өткөрүп, 21 гол киргизген. Быйыл болгон Дүйнө чемпиондугунда болсо Франциянын улуттук курама командасы менен биринчиликке жетишип, мыкты жаш оюнчу деп табылган.

Автор: Бектур Токтоноев