Жайкы Азия оюндары: Кыргыз суучулдары финалдык жарышка өтө албай калышты

Бүгүн, 22-августта Индонезияда өтүп жаткан Жайкы Азия оюндарынын сууда сүзүү боюнча мелдештер уланууда. Анда Кыргыз өлкөсүнөн 3 суучул катышты, алар Денис Петрашов, Владислав Шулико жана Елизавета Рогожникова.

Денис Петрашов брасс стилинде 100 метр аралыктагы жарышка катышты. Петрашов 2-айлампада күч сынашып, 1 мүнөт 2,12 секунд жыйынтыгын көрсөтүп 3-орунду ээледи. Бул көрсөткүч, тилекке каршы, Петрашовго финалдык этапка өтүүгө мүмкүнчүлүк берген жок. Денис Петрашов 32 спортчунун арасында 11-орунга ээ болду.

Владислав Шулико баттерфляй стилинде күч сынашты. Ал 100 метр аралыктагы жарышта 5-айлампада катышып, 55,06 секунд жыйынтыгын көрсөттү. Бул көрсөткүч менен Шулико айлампада 7-орунду ээлеп, финалдык жарышка катышпай калды. Владислав Шулико жалпы 31 спортчунун арасында 21-орунду ээледи.

Елизавета Рогожникова эркин стилинде 200 метр аралыктагы жарышка катышты. Ал 1-айлампада күч сынашып, 2 мүнөт, 7,92 секунд жыйынтыгын көрсөттү. Бул көрсөткүч менен Рогожникова айлампада 6-орунга ээ болуп, кийинки этапка өтпөй калды. Елизавета Рогожникова жалпы 24 спортчунун арасында 15-орунду ээледи.

Айта кетсек, кечээ, 21-августта Денис Петрашов 200 метр аралыктагы брасс стилиндеги жарышка катышып, финалдык бөлүктө 5-орунду ээлеген.

Автор: Нурсултан Нурболот уулу