Кара-Сууда кылмыштуу топтун мүчөсүнүн үйүнөн мыйзамсыз сакталган курал-жарактар, ок-дарылар табылды

Ош шаардык ички иштер башкармалыгынын кызматкерлери тарабынан Кара-Суу районунун аймагынан мыйзамсыз сакталган курал-жарактар менен ок-дарылар алынды. Бул тууралуу бүгүн, 12-сентябрда Ош ШИИБинин басма сөз кызматынан билдиришти.

Ош ШИИБинин экстремизм, мыйзамсыз миграцияга каршы аракеттенүү кызматынын кызматкерлери тарабынан, уурдалган жана тартып алынган ок атуучу куралдарды мыйзамсыз сактаган жарандарды аныктоо иш-чаралары уюштурулду. Жүргүзүлгөн ыкчам иш-чаралардын алкагында Кара-Суу районунун Савай айыл аймагынан мыйзамсыз сакталган курал-жарактар жана ок-дарылар алынды.

"Иликтөө иштеринин алкагында Савай айылынын 32 жаштагы М.Р. аттуу жарандын үйү тинтүүгө алынган. Натыйжада аталган жарандын короосунан жыгач ящикке салынып, жерге көмүлгөн АК-74 үлгүсүндөгү Калашников автоматы, 2 даана ок салуучу куту, КО-8,2 үлгүсүндөгү сайлуу карабин-мылтык, 29 даана 7,62 мм үлгүсүндѳгү Калашников автоматынын ок-дарылары, ок-дарыларды салуучу цинк ящигиндеги 7,62 мм калибриндеги 360 даана ок-дарылары, Blow үлгүсүндѳгү үн чыгаруучу тапанча, дүрбү, курал-жарактын үнүн басаңдатуучу кошумча тетик табылган. Иликтѳѳ иштеринин жүрүшүндѳ мыйзамсыз курал-жарактарды, ок-дарыларды сактоого шектелип кармалган М.Р. аттуу жаран уюшкан кылмыштуу топтун мүчѳсү экендиги аныкталган", - деп айтылат маалыматта.

Бул факт боюнча Ош ШИИБинин тергѳѳ кызматы кылмыш ишин козгоп, алынган курал-жарактарга тиешелүү экспертизалар дайындалды. Алардын башка кылмыштарга тиешеси бар же жок экендиги текшерилет. Кылмыш ишинин алкагында үй ээси убактылуу кармоочу жайга киргизилди.

Автор: Мальвина Уметбекова