Жаштар арасындагы оор атлетика боюнча Азия чемпиондугу расмий түрдө ачылды

Ачылыш аземинин жүрүшүндө "Камбаркан" фольклордук ансамбли, "Тумар КР" жана “Акмарал” бий топтору өнөрлөрүн тартуулашты

Ырчы Омар мелдештин катышуучуларына ийгилик каалап, “Кыргызстаным” деген ырын тартуулады

КРнын Оор атлетика федерациясынын президенти Ахматбек Келдибеков мелдешти уюштурууда зор салым кошкон Дене тарбия жана спорт мамлекеттик агенттигинин жаңы жана эски жетекчилигине ыраазычылык билдирип өттү

Ачылышка эл толо келген жок. Бирок мелдеш күндөрү зал толо күйөрмандар келеринен уюштуруучулардын үмүтү чоң

Мелдешке катышуучу командалардын 12си эл алдына чыгышты

Дене тарбия жана спорт агенттигинин директору Мурат Саралинов мелдешти ачып берди

Алып баруучулар командаларды эл алдына чакырууда

Спорт ордосунда спортчулардын атайын даярдык көрүүсү үчүн жай даярдалып, штангалар коюлган

Бүгүн, 3-июлда Бишкектеги Кожомкул атындагы Спорт Ордосунда жаштар жана чеберлер арасында өтүүчү оор атлетика боюнча Азия чемпиондугунун ачылыш аземи болуп өттү. Анда мелдешке катышуучу Түштүк Корея, Кытай, Япония, Тажикстан, Индия, Казакстан, Монголия, Таиланд, Сирия, Тайвань, Өзбекстан, Ирак жана Кувейт мамлекеттеринен келген спортчулар эл алдында тааныштырылды. Мелдеш КРнын Өкмөтүнүн алдындагы Дене тарбия жана спорт агенттигинин директору Мурат Саралиновдун сөзү менен ачык деп жарыяланды. Андан соң КРнын Оор атлетика федерациясынын президенти Ахматбек Келдибеков сөз сүйлөдү. Ачылыш аземинин акыркы мүнөттөрү жергиликтүү ырчы, бийчилердин чакан шоу-программасына бөлүндү. Эске салсак, мелдеш 8-июлга чейин созулат. Ага Азия чөлкөмүнөн 14 мамлекеттин 100дөн ашуун спортчусу катышмакчы. Алдын ала белгилүү болгондой, Кыргызстандын намысын 10 спортчу коргойт.

Автор: Максат Кудайбердиев
Фото: Нурдин Султанбаев