Ноокат районунда мас абалында 6 жаштагы кызды зордуктоого аракет кылган жаран 20 жылга эркинен ажыратылды

Ноокат районунда мас абалында 6 жаштагы кызды зордуктоого аракет кылган жаран 20 жылга эркинен ажыратылды. Бул тууралуу бүгүн, 18-сентябрда маалымат жыйынында Башкы прокуратуранын кылмыш жана жарандык сот иштерин өндүрүү башкармалыгынын жетекчисинин орун басары Эльмира Жумашова билдирди.

Маалыматка ылайык, окуя 2017-жылы 30-ноябрь күнү болжол менен саат 10:30 чамасында болгон. Анда 6 жашар кызды мектепке бара жаткан жеринен Байыш айылынын 42 жаштагы Сапарбек Калил уулу аттуу тургуну мас абалында зордуктоого аракет кылган. Ал кызды ээн жерге алып барып чечинтип, анын каршылыгына карабастан зордуктоо аракетин көргөн. Ошол учурда айыл тургундары кыйкырып жаткан кызга жардамга келип, милиция кызматкерлерин чакырышкан.

Бул факт боюнча кылмыш иши козголгон. Ноокат райондук сотунун чечими менен С.Калил уулу 20 жылга эркинен ажыратылып, жазасын күчөтүлгөн тартипте түзөтүү абагында өтөөсүн белгилеген. Айыпталуучу ага карата чыккан соттун чечимине каршы экенин билдирип, облустук сотко кайрылган. Облустук сот ишти карап чыгып, райондук соттун чечимин күчүндө калтырган.

Автор: Мальвина Уметбекова