Ош-Москва аба каттамы менен уча турган учактын дөңгөлөгү жарылып рейс 9 саатка кармалды. Москвадан түндө келе турган жүргүнчүлөр келе элек

Кечээ, 30-сентябрда Ош-Москва аба каттамы менен уча турган учактын дөңгөлөгү жарылып, рейс 9 саатка кармалды. Натыйжада эртең менен саат 8:30да 147 жүргүнчүсү менен уча турган учак саат 17:54тө кеткен. Мунун кесепетинен түнкү рейс бүгүнкү күнгө жылган.

SUPER.KG порталына Москва-Ош аба каттамы менен келе турган жүргүнчү билдиргендей, бул кырсыктын айынан Москва шаарынан келе турган учак да 8-9 саатка кармалган. Натыйжада 100 жүргүнчү аэропортто мекенине кайтуу үчүн өз рейсин күтүүгө аргасыз болушкан.

"Ош" эл аралык аэропортунан маалымдашкандай, кечээги окуядан кийин Москва-Ош багыты менен келе турган кечки рейс эртең мененки убакытка жылдырылган. “Москва-Ош каттамы менен кечээ саат 22:35те уча турган рейс эртең менен саат 6:30га которулган. 1 сааттын ичинде "Ош" эл аралык аэропортуна келип конушу керек”, - деп билдиришти "Ош" эл аралык аэропортунан.

Эске салсак, кечээ, 30-сентябрда саат 8:30да Ош-Москва аба каттамы менен уча турган Boeing 737 үлгүсүндөгү учактын алдыңкы шассисиндеги дөңгөлөк жарылып, учак токтотулган. Жүргүнчүлөрдү Москвага жеткирүү үчүн Бишкектен учак жөнөтүлүп, 9 сааттык кармоодон кийин учак абага көтөрүлгөн. Окуяны жеринен иликтөө үчүн комиссия түзүлүп, атайын инспектор кеткен.