Кечээ, 1-октябрда Биринчи Май райондук сотунда ИИМ министринин мурдагы орун басарынын уулу Нурбек Нурбаев сүзүп кеткен 19 жаштагы кыздын окуясы боюнча соттук отурум улантылды.
Соттук кароонун жүрүшүндө Нурбаевдин жактоочусу айыпталуучу окуя болгон түнү спирттик ичимдик ичпегенин жана ал "Корвалол" деген дары ичкенин билдирди. Ошондой эле ал кайрадан соттук экспертиза өткөрүү керектигин кошумчалаганын "Кактус Медиа" басылмасы жазып чыкты.
"Соттук иштин жүрүшүндө эксперттер да көрсөтмө беришти. Алардын айтымында, айыпталуучу ошол түнү мас болгондугун так аныктаган далил болгон эмес. Эксперт, менимче, айыпталуучуну мас деп сырткы көрүнүшүнөн улам сыпаттаган. Медициналык протокол толтурууда да катачылыктар кеткен. Анда Нурбаевдин көзүнүн каректери чоңоюп кеткенин жазышкан, анын жүрүм-турумундагы белгилер анын мас абалда экендигинен кабар бербейт. Ушул себептерден улам, кайрадан комиссиялык экспертиза өткөрүү керек", - деп кошумчалады жактоочу.
Жактоочунун айтымына караганда, толтурулган протоколдо айыпталуучунун сүйлөгөн сөздөрү түшүнүктүү жана жүрүм-туруму орундуу болгон.
Мамлекеттик айыптоочу сотко кайрылып жактоочунун өтүнүчүн канааттандырбоого чакырды.
"Тиешелүү экспертизалардын баары аткарылган. Ошондой эле химиялык экспертиза да өткөрүлгөн. Анда Нурбаевдин канында этил спирти бар экени аныкталган", - деди айыптоочу Асланбек Назырынбеков.
Кеңешме бөлмөсүнөн келген сот Мирлан Термечиков, жактоочунун өтүнүчүн четке кагып, айыпталуучу суракка алынды.
"14-апрель күнү таңкы саат 4 же 5 чамасында мен Чүй кең көчөсү менен чыгыш тарапка кетип бара жаткам. Тоголок Молдо көчөсүнө жетпей, сол тараптан эки унаа токтоп турганын көрдүм. Анда милиция кызматкерлеринин жана БМВ Х-5 үлгүсүндөгү унаалар токтоп турган. Экинчи унаадан кыз түшүп, милиция кызматкерлеринин ортосунан өттү. Мен аны көрдүм, ал жолдун ортосуна чейин жетип, анан токтоп калды. Мен ал токтоп турат деп ойлодум. Ортодогу аралык болжол менен 20 метрдей болгон учурда ал алдыга чуркады, мен рулду буруп кетүүгө аракеттендим. Унааны токтотуп, оң тарапка бурдум, бирок аны сүзүп алдым. Ал унаама урулуп, жерге түштү, мен аны айланып өтүп анан токтодум", - деди айыпталуучу.
Ошондой эле айыпталуучу окуя болгон жерге алгач милиция кызматкерлери келгенин, андан кийин анын эжеси келгенин билдирди. Айтымында, ал өзүнө келүүсү үчүн эжеси "Корвалол" дарысын берген.
"Мен нес абалында болчумун, өзүмдү жоготуп койдум. Мени өзүнө келсин деп эжем дары берди. Ал кыз түз эле басып келе жаткан, мас эмес болчу. Унаада досум бар эле, таңга маал досум менен акча табуу максатында таксист болуп иштей калайын деп чыккам. Мен спирттик ичимдик ичкен эмесмин, болгону бир бөтөлкө алкоголсуз сыра ичкем", - деди айыпталуучу Нурбаев.
Ал эми судьянын химиялык экспертизада эмне себептен этил спирти чыккандыгына айыпталуучу жооп бере алган жок. Тергөө материалдарынын маалыматына ылайык, айыпталуучу күнөөнү моюнуна алган эмес.
Айта кетсек, буга чейин Бишкек ШИИББинен мас абалындагы 25 жаштагы айдоочу 19 жаштагы кызды 20 метрдей жерге ыргыта сүзүп, кийин тебелеп кеткенин кабарлаган. Жаракат алган кыз ошол жерден каза болгон. Ал эми жол кырсыгы ошол жердеги видеокөзөмөлгө түшүп калган. Наркологиялык экспертиза айдоочу мас абалында болгонун аныктаган. Сүзүп алган 25 жаштагы Н.Н. аттуу айдоочу 16-апрелде СИЗО-1ге эки айга камакка алынган. Кызды тебелеп кеткен унаанын айдоочусу ички иштер министринин мурдагы орун басары Нурбай Касымбаевдин уулу экени айтылган. Кийин каза болгон кыздын атасынын арызды кайтарып алганын, ага жабырлануучу тараптын келтирилген чыгымдын баарын төлөп бергени себеп болгону айтылган.
Кечээ, 1-октябрда Биринчи Май райондук сотунда ИИМ министринин мурдагы орун басарынын уулу Нурбек Нурбаев сүзүп кеткен 19 жаштагы кыздын окуясы боюнча соттук отурум улантылды.
