Өзгөндө жөө адамдар өтүүчү тилкеден өтүп баратканда унаа сүзүп каза болгон аялдын аты-жөнү такталды

Ош облусунун Өзгөн районунда жолдон өтүп бараткан учурда унаа сүзүп каза болгон аялдын аты-жөнү такталды. Бул тууралуу Ош облустук Жол кыймылынын коопсуздугун көзөмөлдөө бөлүмүнөн кабарлашты.

"Кырсыктан каза болгон Кара-Суу районунун 46 жаштагы тургуну А.З. аттуу аял экени аныкталды. Маркумдун жакындары анын сөөгүн Өзгөн райондук ооруканасынын өлүк сактоочу жайынан алып кетишти", - деди аталган бөлүмдөн.

Эске салсак, 1-октябрь күнү саат 22:00 чамасында Бишкек-Ош унаа жолунун 632-чакырымында, тактап айтканда, Куршаб айылынын чыга беришинде аялды катуу келе жаткан унаа өлтүрө сүзүп кеткен. Облустук милиция маркум аялдын ким экендиги такталбай жатканын айтып, маалымат тараткан.