Бишкектин сыртында куураган чөп өрттөндү

Чүй облусунун Аламүдүн районундагы Арчалуу тоосунда куураган чөп өрттөндү. Бул тууралуу Өзгөчө кырдаалдар министрлигинин басма сөз кызматы билдирди.

Маалым болгондой, өрт 5-октябрь күнү Байтик баатыр айыл аймагына караштуу Байгелди айылындагы Арчалуу тоосунан чыккан.

"Өрттү өчүрүү иш-чараларын жүргүзүү максатында саат 04:32де Аламүдүн райондук №1-өзгөчө кырдаалдар бөлүмүнөн 11 кызматкер тартылган. Саат 05:05те Сокулук районунан дагы 9 куткаруучу ошол аймакка жиберилген. Жалпысынан 28 куткаруучу иш алып барды. Дагы кошумча маалымат берилет", - деди басма сөз кызматкери.

Аталган өрт Бишкек шаарынан да көрүнүп, калаа тургундары аны сүрөткө тартып алышкан.

Автор: Айсалкын Качкынбекова