Кыргыз режиссёрунун "Аврора" тасмасын Түштүк Кореяда өтүп жаткан кинофестивалда жылуу кабыл алышты

Кыргыз режиссёрунун "Аврора" тасмасын Түштүк Кореянын Пусан шаарында өтүп жаткан кинофестивалда жылуу кабыл алышты. Бул тууралуу кино таануучу Гүльбара Төлөмүшова кабарлады.

Маалыматка ылайык, Түштүк Кореяда өтүп жаткан XXIII эл аралык Пусан кинофестивалында кыргыз режиссёру Бекзат Пирматовдун "Аврора" тасмасынын бет ачары болуп, ал "Кинодогу жаңы ачылыштар" аталыштагы сынактык программага катышты.

"Аврора" тасмасынын бет ачары болгон соң кино сүйүүчүлөр Бекзат Пирматовдон кол тамга алуу үчүн кезекке турушту. Тасма көрсөтүлүп бүткөн соң талкуу болду. Анда катышуучулар тасма тууралуу кызыктырган суроолоруна жооп алышты. Сынактын жыйынтыгы 13-октябрда белгилүү болот", - деди Төлөмүшова.

Белгилей кетсек, буга чейин кыргыз кинолору сынактык программага катышкан эмес. Ал эми белгилүү режиссёрлор Актан Арым Кубат, Эрнест Абдыжапаров, Таалайбек Кулмендиевдин тасмалары сынактан тышкаркы "Азия - кино дүйнөсүнө терезе" аттуу расмий программага катышкан.

Автор: Айзада Тураркулова