Баткенде кичи автобуста бара жатып кырсыкка кабылып жабыркаган 22 адамдын төртөө эсине келе элек

Баткен облусунда катталган жол кырсыгында ар түрдүү жаракаттарды алган 6 жүргүнчү оорукананын жандандыруу бөлүмүнө түштү. Бул тууралуу бүгүн, 18-октябрда SUPER.KG порталына облустук оорукананын башчысы Нурлан Салиевге байланышканыбызда билдирди.

Маалыматка ылайык, учурда жандандыруу бөлүмүндө 6 адам оор абалда жатат, алардын ичинен 4 адам кечээ күндөн бери эсине келе элек.

"Жол кырсыгынан ар түрдүү жаракат менен жалпысынан 22 адам келип түштү. Оор жаракаттан 1 жүргүнчү каза болгон, бирок ал ооруканага алып келинген жок. 4 адамдын абалы оор болчу, түндө дагы эки адамдын абалы оорлошконунан жандандыруу бөлүмүнө которулду. Кечээ жеңил жаракат алган 2 адам ооруканадан чыгарылган", - дейт Салиев.

Эске салсак, кечээ Ош-Баткен-Исфана жолунда эки Мерседес-Бенц-Спринтер унаалары сүзүшүп, 22 адам ар түрдүү жаракаттарды алып, 1 адам каза болгон. Жол кырсыгы Ак-Татыр аймагында орун алган. Анда жүргүнчүлөрдү ташыган Мерседес-Бенц-Спринтер унаасы менен жүк ташыган унаа бетме-бет сүзүшкөн.