Бишкекте 15 жаштагы кыздын өлүмүнө шектелген дарыгер үй камагына чыгарылды

Бишкекте 15 жаштагы кыздын өлүмүнө шектелип жаткан №8-үй-бүлөлүк дарыгерлер борборунун кызматкери үй камагына чыгарылды. Бул тууралуу бүгүн, 15-ноябрда шаардык милициядан билдиришти.

Маалыматка ылайык, дарыгерге карата чечимди Свердлов райондук соту чыгарган.

Бишкек шаарынын 15 жаштагы тургуну ушул жылдын август айында №8-үй-бүлөлүк дарыгерлер борборунда ийне сайылгандан кийин каза болуп калган. Ал невропатологдо дарылоодон өтүп жаткан. Саламаттыкты сактоо министрлиги атайын комиссия түзүп, окуянын чоо-жайын тактап баштаган. Дарыгерге карата Кылмыш-жаза кодексинин 119-беренеси “медициналык кызматкердин өзүнүн кесиптик милдеттерин талапка ылайык аткарбоосу) менен кылмыш иши козголгон.

Автор: Айсалкын Качкынбекова