ЖЫЛНААМА, 16-НОЯБРЬ: Күйөрмандарын жагымдуу жылмаюусу менен арбап алган корей актёру Пак Хёң Шик 27 жашка толду

Бүгүн күйөрмандарын жагымдуу жылмаюусу менен арбап алган атактуу корей актёру жана ырчысы Пак Хёң Шик 27 жашка чыкты. Ал көпчүлүккө "Бул үй-бүлөгө эмне болгон?", "Мураскерлер", "Балбан билек До Бон Сун" жана башка дорамалардагы көрүнүктүү ролу менен белгилүү.

«Мураскерлер» дорамасында автоунаа импорттоочу компаниянын мураскери болсо дагы, үй-бүлөлүк бизнести уланткысы келбейт.

Туулган күнү - 16-ноябрь, 1991-жыл

Туулган жери - Сеул шаары, Түштүк Корея

Үй-бүлөсү - ата-энеси, агасы

Бою - 183 сантиметр

Карьерасын 2010-жылы "Глория" жана "Татынакай прокурор" дорамаларынан эпизоддук роль алуу менен баштап, ага удаа эле популярдуу телешоу, музыкалык долбоорлорго катышып, өзүнүн ырчылык дареметин сынап көргөн. Ырчы катары таанылуу менен катар тасма талаасында "Сириус", "Мураскерлер", "Бул үй-бүлөгө эмне болгон?", " Гу Хэ Ра, багынба" жана башка сериалдарда образ жарата баштаган.

Пак Хёң Шик 2013-жылы атактуу актёрлор Ли Мин Хо, Ким У Бин жана Пак Шин Хе менен биргеликте "Мураскерлер" сериалына тартылган. Дал ушул сериал аны көпчүлүккө тааныткан. Бай адамдын уулунун образын жаратуу "Жогорку кооомчулук" деген сериалда да уланган.

2016-жылы "Хваран: Башталыш" аттуу дорамада Пак Хёң Шик Кореянын тарыхындагы үч падышалыкты бириктирген Силла өлкөсүнүн падышасынын ролун чагылдырып берген.

«Хваран: Башталыш» дорамасында Кореянын тарыхындагы үч падышалыкты бириктирип турган тарыхый инсандын ролун ойногон.

Актёр башкы ролду аткарган "Балбан билек Дон Бон Су" аттуу дорама 2017-жылы эң мыкты дорама деп табылган. Ошол эле учурда Пак Хёң Шик "Жылдын мыкты актёру" сыйлыгын жеңип алган.

2018-жылы болсо "Форс-мажорлор" аттуу сериалда америкалык сериалдагы Майк Росстун жаңы версиясын мыкты чагылдырып берген.

«Форс-мажорлор» тасмасында билими жок болсо да акылдуулук жана сөзмөрлүгү менен калаган нерсесине жете алган келишимдүү мырзанын образын чебер аткарган.

Учурда таланттуу актёр 2019-жылы жарык көрүүчү "Чындык издеген арачылар" аттуу тасмада арачы катары чындыктын артынан түшкөн жигиттин ролун ойноодо.

Пак Хёң Шик учурда «Чындык издеген арачылар» тасмасына тартылууда.
Жеке жашоосу

Жеке жашоосун сыр тутууну жактырган актёр 2017-жылы актриса Пак Бо Ёнго болгон сезимдерин ачыктаган.

Пак Хёң Шик менен Пак Бо Ён "Балбан билек До Бон Сун" дорамасына тартылуу учурунда таанышкан. Экөөнүн сүйүшкөн жаштардын назик сезимдерин идеалдуу ачып берүүсү миллиондогон көрүүчүлөрдүн жүрөгүн элжиреткен. Кийинчерээк актёр аталган сериалга Пак Бо Ён үчүн гана катышканын билдирген.

Пак Бо Ён жана Пак Хёң Шик

Бирок журналисттерге берген билдирүүлөрүндө идеалдуу кыз катары "Girl’s Generation" кыздар тобунун ырчысы Сохёнду көрөрүн айткан.

«Girl’s Generation» кыздар тобунун ырчысы Сохён

Кызыктуу маалыматтар

Карьерасын баштагандан тарта эң көп суроо-талапка ээ модель катары да эмгектенип келет.
Ар бир адамга жасаган өзгөчө мамилеси үчүн санаалаштары "ханзаада" деп коюшат.
ZE:A балдар тобундагы эң бою узуну жана келбеттүүсү саналат.

16-ноябрга карата жылнаама.

Автор: Гүлзахира Дөөлөталы кызы