Өспүрүмдөр арасындагы "Евровидение" сынагында 13 жаштагы кыз жеңүүчү деп табылды

Беларусиянын борбору Минск шаарында өткөн өспүрүмдөр арасындагы "Евровидение" эл аралык музыкалык сынагында польшалык 13 жаштагы Роксана Венгель жеңүүчү деп табылды. Бул тууралуу сынактын расмий сайты кабарлайт.

Маалыматка караганда, сынактын финалы 25-ноябрда өтүп, анда 20 катышуучу байгелүү орундар үчүн күч сынашкан.

"13-номерде сахнага чыккан Роксана Венгель калыстар тобу берген баадан кийин алдыңкы үчилтикте да жок болчу. Бирок көрүүчүлөрдүн колдоосу менен ал 215 упай топтоп жеңүүчү деп табылды", - деп жазылат маалыматта.

Сынактын жыйынтыгында 2-орунду 203 упай менен Франция алса, 3-орунда 201 упай топтогон Австралия жайгашты. Ошондой эле алдыңкы ондукка Украина, Мальта, Казакстан, Италия, Грузия жана Армениядан келген ырчылар кирген. Орусиянын атынан катышкан Анна Филипчук 10-орунду ээледи.

Автор: Айзада Тураркулова