Кардарына жасаган жакшылыгы менен бүтүндөй өлкө сыймыктанган Кайрат Тентимишев аз күнгө эс алууга үйүнө келди

АНЫН МЕКЕНИНЕ КЕЛИШИНЕ BEELINE КОМПАНИЯСЫ КӨМӨК КӨРСӨТТҮ

Буга чейин орусиялык интернет колдонуучу Варя Борцова өзүнүн социалдык тармактагы баракчасына таасирдүү окуясын бөлүшкөн. Анда ал чет элден Москва шаарына учуп келип, үйүнө жеткирип барган таксисттин унаасына сумкасын унутуп калганын, буюмун кайтаруу үчүн ал жигит суукка карабай үйүнүн алдында 8 саат күтүп турганына ыраазы болгонун жазган. Сумкасында көп суммадагы акчасы жана документтери болгон.

Борцова окуядан кийин аны издөөгө киришкен. Ал Чүй облусундагы Асыл-Баш айылынын 30 жаштагы Кайрат Тентимишев деген тургуну болуп чыккан. Көпчүлүккө үлгү болгон иш-аракети үчүн Beeline компаниясы Тентимишевге бир жылдан бери көрүшө элек кыздары менен жолугуп кетүүсүнө шарт түздү.

"Beeline коомчулук үчүн түшүнүктүү жана жөнөкөй болгон байланышка карай багыт алды. Биз калыс, ачык жана ынтымактуу болууга аракет жасайбыз. Албетте, биз менен бир толкунда болдгондорду колдойбуз. Кайрат негизи өзгөчөлөнгөн аракетти көрсөткөн жок, болгону абийири менен иш жасады, бирок коомчулук моралдык баалуулуктардан арылып бараткан ушул тапта анын кардарын 8 саат күткөнү жалпы эл үчүн үлгү болду.

Биздин мекендешибиз аз убакытка болсо да үй-бүлөсү - кыздары жана ата-энеси менен чогуу болуп жаңы күч топтоп кетти деп ишенебиз. Үй-бүлөсүнөн алыста жүргөн адам үчүн алар менен чогуу өткөргөн ар бир мүнөтү баалуу эмеспи. Биз бардык Кыргыз жарандарына жакындары менен бетме-бет жолугуп, сүйлөшүп, жетелешип, бири-бирине жакшы сезимдерин, ыраазычылыгын билдирип жашашын каалайбыз. Мунун баары татаал эмес эле нерселер эмеспи", - деп айтылат компаниянын билдирүүсүндө.

Таксисттин айтымында, ал Москвадан келинчеги менен келген.

"Биз барганда кыздарыбыз абдан кубанышты. Сагынычыбызды таратып, маңдайыбыз жарыла сүйүнүп, үй-бүлөбүз толукталып божурап эле калдык. Жаңы жыл алдында абдан жагымдуу белек болду", - деди ал.

Кайрат Тентимишевдин жубайы Аида Аязбек кызы экөөнүн 3 кызы бар. Улуу кызы 2-класста, ортончусу 1-класста окуп жатса, кичүүсү 4 жашка чыкты. Кыздарын Тентимишевдин ата-энеси карайт.

"Адамга жасаган ар бир жакшылык эселеп кайтып келерине ишенем. Мен кардарыма жасаган мамилемден кийин көптөгөн жакшылыктарга туш болдум. Кыргыздын Орусиядагы элчилигинен, ар түрдүү коомдордон чакырышып, ыраазычылык баракчаларын тапшырышты. Келе жатканда да аэропорттон тааныгандар учурашып, жакшы кептерин айтып жатышты", - деди ал.

Тентимишев Орусияга туура бир жыл мурун кеткен. Ошондон бери кыздары менен көрүшө элек болчу.

"21-декабрда кайра Орусияга учуп кеттик. Жаңы жыл алдында да сый көрсөтүү үчүн чакырган жактар бар, ошол жактарга барабыз. Менин аракетимди баалаган бардык адамдарга жана Beeline компаниясына ыраазычылык билдирем", - деди ал.