Стамбулда ураган үйдүн алдында 45 саат жаткан өспүрүм куткарылды

Стамбулда 6-февралда урап түшкөн 8 кабаттуу үйдүн алдында 45 саат жаткан өспүрүм аман-эсен куткарылды. Бул тууралуу чет элдик маалымат булактары Түркиянын ИИМ башчысы Сулейман Сойлуга шилтеме берүү менен жазууда.

"Үй урагандан 45 саат өткөндөн кийин куткаруучулар 16 жаштагы баланы алып чыгышты" деген Сойлу. Мерт Айдын аттуу бул өспүрүмдүн абалы тууралуу азырынча маалыматтар айтыла элек.

Буга чейин урандылардын алдынан 5 жаштагы кыз тирүү табылганы маалымдалган. Түркиянын Анадолу басылмасынын маалыматына караганда, куткаруучулар 5 жаштагы Хавву Текгёз аттуу кызды кырсыктан 18 саат өткөндөн кийин табышкан.

Стамбулдун шаардык администрациясынын маалыматына караганда, Картал районундагы кырсыктын кесепетинен кеминде 12 адам каза таап, 13 киши жаракат алган. Учурда куткаруу иштери уланып, 500дөй адам иштеп жатат.

Кырсык 6-февраль күнү катталган. Айрым маалыматтарга караганда, бул үйдө 12 үй-бүлө жашачу жана алдыңкы кабатында кийим тигүүчү жана оңдоочу ателье болгон. Ал жерде 20-25 киши эмгектенип келген. Мындан улам уранды астында кеминде дагы 20дан ашык адам бар болушу мүмкүн экени айтылган. Окуядан кийин өлкөнүн прокуратурасы кырсыктын себебин аныктоо үчүн тергөө ишин баштаган.

Автор: Кызжибек Раимова