Легендарлуу "Кыз-Бурак" тобунун мурдагы солисттери, учурдагы жеке ырчылар Айжамал Кабылова менен Кенже Дүйшееванын ортосундагы чыр уланууда. Учурда эки ырчы социалдык тармактардагы баракчалары аркылуу пикирлерин жазып, ойлору менен бөлүшүүдө. Мурда муздап калган мамиленин кайрадан коомчулукта эмнеге сөз болуп жатканына кайрылсак, ырчы Айжамал Кабылова интернеттеги каналдардын бирине маек берип, анда Кенже Дүйшеева тууралуу кеп козгогон. Маекте Айжамал Кабылова Дүйшеева менен эмнеге мамилесин үзүп койгону тууралуу айтып берген. Мындан кийин Кенже Дүйшеева Инстаграм баракчасына Кабылованын чыгармачылыгына байланыштуу 3 бөлүмдөн турган эскерүү постторун жазды. Кеп башынан болсун.
Айжамал Кабылова: "Ич күйдүүлүк, көралбастык кылды"
- Бүгүнкү күндө мамилебиз жок. Себеби кээде коюнуңдан чыккан душмандардын кылган нерселери ушунчалык оор болот экен. Ал адамды өз бир тууганымдай көрчүмүн, себеби биз бир үйдө чоңойдук, бир нанды бөлүшүп жеп, бир кеседен тамак ичип чоңойдук. Биз ушинтип бир канча жылдардан кийин бири-бирибизге душман болуп калабыз деп эч качан ойлобоптурмун. Бүгүнкү күндө мен ал адамды душманым да, досум да, эжем да дебейм. Бул нерсенин себеби көп: бул жерде менин үй-бүлөмө киришкен учурлары, ич күйдүүлүк, көралбастык болду. Мен ушинтип айтам.
Кенже Дүйшеева: "Майда адамдар үчүн майдаланууга аргасызмын"
Кабылова маек арасында Кенже Дүйшеева тууралуу жогорудагыдай пикирин айткандан кийин, Дүйшеева дагы өз чындыгын айтып чыкты.
"Эгерде сен жөнүндө каралоо, жамандоо токтобосо, демек, ал адамдын жан дүйнөсүндө сенин ордуң дагы деле бош бойдон экенин байкоого болот. Бул ага далил!" - деп сөз баштаган Кенже Дүйшеева.
- Эгер чындап көңүл калса, мага окшоп анын ысымын атоого да ооз барбайт эмеспи. Көралбайт, ичи тар дептирсиң. Бул бүгүнкү же кечээ күнкү ойлор эмес. Көөдөнүңдө көптөгөн жылдар ичиңде сары майдай сактап жүргөн ич күптүүлүгүңдү дааналап айтып алыптырсың. Деги сен кимди көрө алдың? Өткөн күндөрдүн баарын барактабай, бир-экини эсиңе сала кетейин. Баарын айтсак бүгүн барак бети жетпес.
"Жан-жаның" менен элге жаңы тааныла баштаган учурда топтон качып кеттиң. Сенин топко кайра келишиңе көпчүлүгү ошол учурда каршы чыгышса да, артыңдан менден башка ким барып сени алып келди эле? Азыр сен түшүнбөйсүң, учуру келет, сен ырдашың керек деген сөзгө азыр маани бериш кайдан? Жадакалса мектепке ата-энелер чогулушуна менден башка сага ким барды? Алтынчы гана класста болчусуң! Мектепти аяктаган учуруңда алган бааларың укмуш болгондуктан сенин келечегиң үчүн деп, анын баарын калыбына келтирип чуркаган ким эле? Жогорку окуу жайга тапшырууңду ким багыттап, "бүтөрүндө өксүп калбасын" деп, жандалбастап кучагыма гүлдөрдөн толтуруп, алдыңдан менден башка тосуп чыкканы ким барды эле? Тилекке каршы, менден башка сага караштуу бир жан келген эмес.
Үч бөлүктөн турган билдирүүдө Кенже Дүйшеева Айжамал Кабыловага кандай колдоо көрсөткөнүн, телеканалдарга интервью берерде суроолорун алып, жоопторунан бери жазып берип таң аткыча аларды жаттаткан күндөрүн жазган.
- Турмушка чыктың. Тамак жебей жатат, ооруп калды деп чакыртасың. Күндүзү болсо күнү, түнү болсо түнү барып, тамагыңды жедирип, ооруканага чогуу барып, керек болсо уктабастан эртеси аэропортко учуп кеткен күндөрдү кайда жашырасың? Бул нерселер Кенженин сага милдети эмес, энеңден артык мамилеси деп түшүн, эгер адамдык сапатың кичине калган болсо.
Москвада жүргөнүңдө ырдагым келип жатат деп смс-кат жаздың. Нуркан Койчуманова эженин китепчесин жаңы белекке алып, анын ичинен өзүмө даярдап жүргөн "Бир өзүң бол" деген ырдын текстин сага дароо жөнөтүп жибердим, ырдагысы келип калыптыр деп. Себеби сахнадан алыстаганыңа 7 жыл болуп калган. Тартыла турган клиптин идеясынан бери айтып бердим. Ичимде тардык, көралбастык болсо, сенин өмүр жолуңда мындай колдоолор болот беле?
Ырчы Кенже Дүйшеева мындан соң Айжамал Кабылованын үй-бүлөмө киришти деген сөзүнө карата билдирүү жазган. Анда Айжамал Кабылованын жолдошу Кенже Дүйшеевага чалып, Айжамал Кабылова тууралуу арызданганын жазат.
- Ошол күнү түнкү саат 1:30да Азамат (ред. Айжамал Кабылованын мурдагы жолдошу) мага Москвадан чалды. "Эже, сизге айтпасам болбой калды. Сизден башка эч кимге айткан жокмун. Телефон чалсам албай жатат, бирок интернетте отурат", - деди. Акыркы күндөрдөгү чырдашып жүргөнүңөрдүн себебин ошондо уктум. Азамат менен сүйлөшүп бүткөн соң чарчап келгениме карабастан сенин үйүңө бет алдым. Уккан кулагыма ишенбей бараттым...
Сага айтпастан үйүңө бардым. Үйүңдө апаң да бар экен. Менин кеч келгенимди таң калуу менен кабыл алдың. Ошондо экөөбүз ашканада аябай уруштук. Анан апаңды чакырып, Азаматтын чалганын, баарын айтып бердим. Бул нерселерди жалганга чыгарбастырсың! Көп сөз болду. Кийинчерээк жолдошуң Москвадан келип, сен тараптан биринчи ал тарапка жазган смс-билдирүүлөрдү көрсөткөндөн кийин мен сенин мындай кадамыңды оор кабыл алдым.
Эске сала кетсек, Айжамал Кабылованын жолдошу менен ажырашып кетүүсүнө Кабылованын башка адам менен СМС-кат алышканы себеп болгонун "Супер-Инфо" гезити эки тараптуу чагылдырып, жубайларды жараштырууга аракет кылган тараптардын пикирлеринен бери жазып келген.
Кенже Дүйшеева постун улай, "Жолдошуң сенин чыгармачылыгыңды колдочу, сен аны түшүнгөн жоксуң. Москвага кетип жатканыңда үй-бүлөңдү сактап калсаң гана сени менен катташам дедим, бирок сен очогуңду сактап кала алган жоксуң. Азыр деле жарашып кайра чогуу жашасаңар чын дилимден кубанам", - деген пикирде сөзүн улаган.
Буга байланыштуу өз пикирин угуу үчүн ырчы Айжамал Кабыловага байланышканыбызда, ал маселеге унчукпай гана чекит коюуну каалап жатканын айтты.
"Мен бул маселе боюнча пикиримди билгизе албайм, ырбаткым келбейт. Мен сыйлаган улуу кишилер "унчукпай кой" дешти. Мен өзүмдүн жакындарымды, жолдошумду угуп, аларды сыйлагандыктан бул боюнча такыр комментарий бербейм деп чечтим", - деп билдирди.
