Бишкекте 9 күн мурун жол кырсыгына кабылган стилист Асел Мамбеткалиеванын абалында өзгөрүү жок. Ал дале комада жатат

Бишкекте мындан 9 күн мурун жол кырсыгына кабылган стилист Асел Мамбеткалиеванын абалы оор бойдон калууда. Бул тууралуу бүгүн, 25-февралда SUPER.KG'ге Травматология жана ортопедия илим-изилдөө институтунун башкы дарыгери Алмаз Кубатбеков кабарлады.

“Бейтаптын абалы өзгөрүүсүз бойдон калууда. Тилекке каршы, анын абалында эч кандай жылыш жок. Абалы оор болгондугуна байланыштуу жандандыруу бөлүмүндө жатат. Ал жол кырсыгында оор жаракаттарды алган, учурда комада. Азыр дарыгерлердин көзөмөлүндө, ага медициналык жардам көрсөтүлүүдө”, - деди Кубатбеков.

Окуянын чоо-жайына кайрылсак:

Жол кырсыгы 17-февраль күнү болжол менен 8:00 чамасында Бишкектеги Дэн Сяопин жана Фучик көчөлөрүнүн кесилишинде орун алган. Анда Лексус үлгүсүндөгү жол тандабастын айдоочусу жол боюндагы мамыны сүзгөн. Кырсыктын кесепетинен унаанын айдоочусу көз жумуп, жүргүнчү айым оор абалда №4 шаардык ооруканага жеткирилген. Кийин стилист айымдын боору айрылып кеткени, баш мээси катуу чайкалып, баш сөөгү, жамбаш сөөктөрү, кабыргалары да сынганы аныкталган.

Автор: Мальвина Уметбекова