Эки колунан ажыраган жоокердин соттук иши. Жалал-Абад облустук соту командирдин орун басарын актады

Майлуу-Сууда кызмат учурунда токко урунуп, эки колу кесилген Руслан Сапарбаевдин иши Жалал-Абад облустук сотунда каралды. Анда сот командирдин орун басарын актап, ал эми чарба иштери боюнча жетекчини бир жылга шарттуу кести.

Буга чейин Майлуу-Суу шаардык сотунун чечими менен аскердик бөлүктө иштеген эки кызматкер үч жылдан шарттуу кесилген. Шаардык соттун чечимине каршы экенин билдирип, алар облустук сотко кайрылышкан.

22 жаштагы жоокер Руслан Сапарбаев 2018-жылы 7-августта Майлуу-Суу шаарындагы аскердик бөлүктө электр көмөк чордонунун аймагына кирип, токко урунган. Алган жаракатынан улам эки колунун чыканагына чейинки бөлүгү кесилген. Учурда үйүндө дарылануусун улантууда.

Автор: Айсалкын Качкынбекова