Эл өкүлү "Өкмөт элдин турмушун оңдогусу келсе ар бир айылдын тушуна даараткана курсун" дейт

"Өкмөт элдин турмушун оңдогусу келсе, ар бир айылдын тушуна даараткана салып берип коюшсун" деп бүгүн, 27-февралда Жогорку Кеңештин жалпы жыйынында "Улуттук баш кийим Ак калпакка маданий символдун статусун берүү жөнүндө" мыйзамдын долбоору талкуу учурунда депутат Эльвира Сурабалдиева айтты.

"Элдин жашоосун оңдоого багытталган мыйзамдарды киргизүү керек. Мен өкмөткө такыр түшүнгөн жокмун. Ошондо калпакты тигип, сатууну да көзөмөлдөгөн өкмөт мүчөлөрү эмне өздөрү базарга барып калпак сатабы?

Калпакты кордогондорго 1000 сомдон 5 миң сомго чейин айып пул салынат дедиңиз. Мыйзам долбоорунун демилгечиси бул көп деле акча эмес дегениңерге таң калып жатам. Элдин жашоосун оңдойм деген өкмөт айып пул салбайт. Өкмөт ушунчалык эле элдин жашоосун оңдогусу келсе, ар бир айылдын тушуна даараткана салып коюшсунчу.

Буга чейин имараттардын ичинде тамеки чегүүгө тыюу салынган. Бирок ушул жерде отурган депутаттардын баары кабинеттеринде тамеки чегип отурат. Башка айып пулдар менен көйгөйлөр толук чечилип бүтө электе бул нерсени кошуунун кажети жок", - деди Сурабалдиева.

Мыйзам долбоору 1-окууда добуш берүүгө жөнөтүлдү.

Автор: Мальвина Уметбекова