Жалал-Абадда Нооруз майрамына карата 40 казан сүмөлөк кайнатылат

Өлкөдө алгачкы жолу Нооруз майрамын утурлай 20-март күнү Жалал-Абад шаарында сүмөлөк фестивалы өткөрүлөт. Анда "Курманбек" фольклордук талаасында 40 казан сүмөлөк кайнатылат. Бул тууралуу Жалал-Абад шаардык мэриясынын басма сөз кызматы кабарлады.

Белгилүү болгондой, жергиликтүү бийлик тарабынан демилгеленген бул саамалык бир катар оюн-зооктор менен коштолот жана жеңүүчүлөргө сыйлыктар тапшырылат. Шаардык маданият бөлүмүнүн башчысы Салтанат Асилбекованын айтымында, азыркы учурда иш-чаранын сценарийи иштелип чыгып, уюштуруу тобу тарабынан талкууланууда.

"Эң негизгиси шаар тургундарына майрамдык маанай тартуулоо менен бирге улуттук баалуулуктарыбызды даңазалоо. Сынакка катышкан ар бир мекеме-ишкананын жамааттары өндүрүлгөн буудайды тартуудан баштап бышырууга чейинки эрежелерди эске алышы керек. Калыстар тобу тарабынан жеңүүчүлөр аныкталат. Ал эми кайнатылган сүмөлөк 21-март күнү борбордук аянттагы салтанатта жергиликтүү тургундарга таратылат дейт", - Асилбекова.

Иш-чаранын максаты - Аймактарды өнүктүрүү жана өлкөнү санариптештирүү жылында калаанын туристтик потенциалын жогорулатуу. Жергиликтүү бюджеттен бул жылы Нооруз майрамын өткөрүүгө 190 миң сом акча каражаты бөлүнгөн.

Автор: Айпери Ганыжан кызы