Бишкекте батирдин ашканасындагы терезе аркылуу уурулукка киргенге шектүү кармалды

Бишкекте тургундун батирине анын ашканадагы терезеси аркылуу уурулукка кирген деп шектелген адам кармалды. Маалыматты Бишкек ШИИББи кабарлады.

Ага ылайык, 13-мартта саат 21:20 чамасында милициянын нөөмөт бөлүмүнө Түштүк-2 кичи районундагы үйлөрдүн бириндеги батирге белгисиз адам ашканадагы терезе аркылуу уурулукка кирип, качып кеткени кабарланган. Бул боюнча батир ээси Биринчи Май РИИБине арыз жазган.

Анда ал: "Мен жашаган батирге ашкананын айнеги аркылуу кирип, баалуу буюмдарды уурдоого аракет кылган адамга карата чара көрүүнү суранам", - деп жазган.

"Арыз Кылмыштардын жана жоруктардын бирдиктүү реестрине катталып, опер-кызматкерлери уурулукка шектелген Казакстандын жаранын кармашкан. Анын жанынан газ баллон, кол кап, айнек кесүүчү каражат, эшиктин ачкычтары жана 2 уюлдук телефон табылган.

Учурда кармалган адамдын башка кылмыштарга тиешеси бар же жогу текшерилүүдө", - деп жазылат маалыматта.

Автор: Кызжибек Раимова
Фото: Бишкек ШИИББи