Өзгөндө өз атасынан төрөгөн 15 жаштагы кызды башка үй-бүлө убактылуу багып алды

Өзгөндө атасы тарабынан зордукталып, көз жарган 15 жаштагы кызды башка үй-бүлө убактылуу асыроого алды. Бул тууралуу SUPER.KG`ге "Ак жүрөк" кризистик борборунун директору Дарика Асилбекова билдирди.

Анын айтымында, 17-май күнү Өзгөн райондук социалдык бөлүмү кызды башка үй-бүлөгө берген.

"Учурда кыз ал үй-бүлөдө жашай баштады. Социалдык кызматкерлер тынымсыз кыздан кабар алып турушат. Эгер ал жакка көнүп, окуусун улантып же башка бир кесиптик окуу жайда окуй баштаса, кызды ал үй-бүлөгө өткөрүп берүү маселеси каралат", - деди Асилбекова.

Ал эми директор кызды Өзгөн районунун кайсы айылынын тургуну багып алганын айткан жок. Ошондой эле кызды багып алган үй-бүлө тууралуу кенен маалымат кийинчерээк берилерин кошумчалады.

Окуянын чоо-жайы:

Ушул жылдын башында 15 жашар кыз Өзгөндө өз атасы тарабынан зордукталганы кыздын боюна бүтүп калгандан кийин белгилүү болгон. Зордуктоого шектелген атасы 20-январда камакка алынып, кызы социалдык кызматкерлерге өткөрүлүп берилген.

Ал эми Ош шаарындагы "Ак жүрөк" кризистик борборунун жетекчиси Дарика Асилбекова 15 жаштагы кыз 5-апрелде көз жарганын белгилеп, туугандары кызды алып кетүүдөн баш тартканын билдирген. Ал эми 30-апрелде кыздын атасы зордуктоого айыпталып, 12 жыл 6 айга эркинен ажыратылган.

Автор: Айсалкын Качкынбекова