Чемпиондор Лигасынын гимнин кыргыздын улуттук аспаптары аркылуу жаңырткан "Мурас" ансамбли

"Мурас" фольклордук ансамблинин солисттери УЕФАнын гимнин кыргыздын улуттук аспаптарынын коштоосунда жаңыртышты. Ансамблдин солисти Айсаана Оморова бул кабары менен бөлүшүп, SUPER.KG`ге буларды айтып берди.

"Футбол сүйүүчүлөрүнө 1-июнда өтө турган Чемпиондор Лигасынын финалына карата белек кылалы деп гимнди аткарып чыктык. Музыканы жаздырууда эч кандай кыйынчылыктар болгон жок. Бир күндүн ичинде даярдап бүтүрдүк. Биздин максатыбыз - кыргыздын аспаптарын дүйнөлүк музыка аркылуу таанытуу. Ошондой эле бул музыка менен кыргыздын жаш спортчуларын шыктандырып, дем-күч бергибиз келди. Биздин дагы келечек муун ушундай чоң турнирлерде оюн көрсөтүшүнө тилектешпиз", - дейт ал.

Комузчу Айсаана Оморова Чемпиондор Лигасынын гимнин аткарууда комуз, кыл кыяк, сыбызгы, чоор, добулбас жана виолончель (бас кыяк) аспаптары колдонулганын кошумчалады.