"Ош базарындагы" авиакассадан алданган адамдар "шектүүлөр жашайт" деген үйдү кайтарышууда

"Ош базарынын" жанында Чүй-Бейшеналиева көчөлөрүнүн кесилишинде жайгашкан авиакассадан "80ден ашык адамга жараксыз билет саткан" деп шектелген жарандар кармала элек. Бул тууралуу SUPER.KG порталына жабырлануучулардын бири Бермет Раимбекова билдирди.

Анын айтымында, акыркы 3 күндөн бери алданып калгандар "шектүү жарандар жашайт" делген үйлөрдү кезек менен кайтарып жатышат.

"Созулуп жатканынан улам үйлөрүн кайтарып, балким, өзүбүз жолугуп каларбыз деген үмүт менен жүрөбүз. Милиция кызматкерлери деле издеп жатабыз дешүүдө. Азырынча маалыматтар ушулар", - деди Раимбекова.

Буга чейин аталган базардагы авиакассадан билет сатып алып, алданып калдык деп SUPER.KG порталына 7 жабырлануучу кайрылган. Алардын айтымында, алдангандардын саны 80ден ашуун. Бул иш боюнча шектүү жарандарга Ленин РИИБинин кызматкерлери издөө иштерин жүргүзүп жатканы кабарланган.