Бишкекте казакстандык продюсер, актриса Баян Максат кызы роль аткарып, продюсерлик кылган тасма көрсөтүлдү

Бишкек шаарына казакстандык продюсер, актриса, ырчы, алпаруучу Баян Максат кызы үй-бүлөсү менен келди. Тагыраагы, ал продюсерлик кылган жана роль аткарган "Тагдыр бекети" тасмасы Бишкек шаарындагы кинотеатрлардын биринде жабык көрсөтүлдү.

Тасма тууралуу кыскача:

23 жаштагы Улан аттуу жигит кезектеги мыйзамсыз ишин жасап, полиция кызматкерлеринен качам деп поезддин вагонуна түшүп кетет. Ал жактан Гүлназ аттуу кызды жолуктуруп, сүйүп калат. Кыз-жигиттер кудум эле бири-бири үчүн жаралгандай. Бирок тагдыр жаштарга ары оор, ары татаал сыноолорду даярдайт. Улан менен Гүлназ ак сүйүүсүн сактап калуу үчүн ал оорчулуктарды башынан өткөрүшү керек эле. Бирок кыз менен жигиттин ата-энелеринин башынан өткөргөн окуясы аларга тоскоолдук жаратат. Тасманын жүрүшүндө кызыктуу окуялар орун алат. Ал эми Улан менен Гүлназдын сүйүү баяны аяктайбы же күчөйбү тасмадан көрүүнү сунуштайбыз.

Баян Максат кызы продюсерлик кылган тасманын жабык көрсөтүүсүнө ырчы Анжелика дагы келген.

"Тагдыр бекети" тасмасы 11-июндан баштап Бишкектеги кинотеатрларда көрсөтүлө баштайт.