Бишкекте чак түштө бычак менен коркутуп, акча жана телефонду тоноп кеткен деген шек менен эки жаран кармалды

Бишкектеги Биринчи Май РИИБинин кызматкерлери тоноого шектелген эки жаранды кармады. Бул тууралуу Бишкек ШИИББинин басма сөз кызматы билдирди.

Маалыматка ылайык, 10-июль күнү Биринчи Май РИИБинин нөөмөт бөлүмүнө шаар тургуну кайрылган. Анда жабырлануучуну саат 15:00 чамасында Манас-Фрунзе көчөлөрүнүн кесилишинен белгисиз жарандар бычак менен коркутуп, Редми А-6 телефонун жана 20 миң сом акчасын тоноп, белгисиз тарапка из жашырып качып кеткенин айтып, чара көрүүнү суранган.

Бул факты Кылмыштардын жана жоруктардын бирдиктүү реестрине катталып, 202-берене "каракчылык" менен сотко чейинки өндүрүшкө алынган.

Ыкчам-иликтөө иштеринин натыйжасында 19 жаштагы Д.А. жана 17 жаштагы Т.А. шектүү катары кармалган. Учурда шектүүлөр Бишкек ШИИББинин убактылуу кармоочу жайына киргизилип, тергөө иштери башталганы жазылат маалыматта.

Автор: Айсалкын Качкынбекова