Жайылда унаасын жуудурганга калтырган кардардын машинасын айдап кеткен жумушчу кырсыкка кабылды

Жайыл районунда унаа жуучу жайга машинасын жуудурууга калтырган кардардын унаасын аталган жайдын жумушчусу айдап кетип, кырсыкка учураган. Бул тууралуу Чүй облустук милициядан билдиришти.

Маалыматка ылайык, милицияга Кара-Балта шаарынын тургуну кайрылып, унаа жуучу жайдын жумушчусуна чара көрүүнү суранган.

"14-июнда Кара-Балта шаарынын тургуну өзүнүн Honda Odyssey үлгүсүндөгү унаасын химиялык тазалоо үчүн унаа жуучу жайга калтырып, эки күндөн кийин алып кетмек болгон. Ал 2 күндөн кийин келгенде унаасынын сүзүлгөнүн байкаган.Териштирүү иштеринде унаа жуучу жайдын жумушчусу унааны уруксаты жок айдап чыгып, кырсыкка кабылганы белгилүү болгон. Учурда машина айып аянтына токтотулуп, бул факты Кылмыштардын жана жоруктардын бирдиктүү реестрине катталган. Шектүү катары 28 жаштагы жаран кармалып, убактылуу кармоочу жайга камакка алынды", - деп билдирет басма сөз кызматынан.

Автор: Айсалкын Качкынбекова