Бишкекте оңдоп-түзөө иштери жүргүзүлүп жаткан Токтогул көчөсүнүн бир бөлүгү ачылды

Бишкектеги Токтогул көчөсүнүн айрым бөлүгү транспорт каражаттары үчүн ачылды. Бишкек мэриясынын капиталдык курулуш башкармалыгынан билдиргендей, Токтогул көчөсүнүн Манас кең көчөсү менен Турусбеков көчөсүнө чейинки бөлүгүндө оңдоп-түзөө иштери аяктады.

"Техникалык себептерге байланыштуу Токтогул көчөсү менен Турусбеков көчөсүнүн кесилишине асфальт төшөлө элек. Жолду асфальттоо 10 күндөн кийин башталып, жол жабылбайт", - деп жазылат маалыматта.

Токтогул көчөсүнүн Манас кең көчөсү менен Үмөталиев, Турусбеков көчөлөрүнө чейинки бөлүгү 10-июлда жабылган. Бул аймакта "Бишкек жылуулук тармагы" ишканасы жылуулук түтүктөрүн оңдоп-түзөө иштерин жасоодо. Ремонт иштери 25-августка чейин уланары маалымдалган.

Ал эми Токтогул көчөсүнүн Турусбеков менен Үмөталиев көчөлөрүнө чейинки бөлүгү жабык бойдон калууда.

Автор: Бактыгүл Момбекова