Бишкектеги 4 адамдын өмүрүн алган жол кырсыгы. Автобустун айдоочусу жандандыруу бөлүмүндө

Бишкектин Чыңгыз Айтматов кең көчөсүндөгү 4 адамдын өмүрүн алган жол кырсыгындагы автобустун айдоочусу жандандыруу бөлүмүндө жатат. Бул тууралуу Бишкек шаардык мэриясына караштуу "Бишкек жүргүнчүлөрдү ташуу" автотранспорттук мекемесинен билдиришти.

Маалыматка ылайык, аталган мекеменин кызматкерлери кечээ, 9-сентябрда айдоочунун абалы менен таанышып келишкен.

"Бүгүн айдоочу палатага которулушу мүмкүн. Биздин мекеме жана башка автобустун айдоочулары кырсыктаган жарандарга жана ооруканадагы айдоочуга жардам берели деп жатабыз", - деди мекемеден.

Бишкектеги Чыңгыз Айтматов кең көчөсүндө, тактап айтканда, Киргизия-2 жаңы конушунун тушунда 2 унаанын катышуусунда жол кырсыгы катталганы маалымдалган. Кырсыктын кесепетинен жеңил унаадагы 17 жаштагы 4 жаран окуя болгон жерден каза болгон. Ал эми 7 адам ар кандай жаракаттарды алып ооруканага жеткирилген. Алардын арасында автобустун айдоочусу да бар.