Жалал-Абад шаарынын аймагында уурулук менен алектенген кылмыштуу топ кармалды

Жалал-Абад шаарынын аймагында уурулук менен алектенген кылмыштуу топ кармалды. Бул тууралуу облустук милициядан билдиришти.

Маалыматка ылайык, октябрь айында Жалал-Абад ШИИБине 7 адам арыз менен кайрылып, ар түрдүү суммадагы буюмдарын белгисиз кылмышкерлер уурдап кетишкендигин айтышып, мыйзамдуу чара көрүүнү өтүнүшкөн. Алардын бири үйдө эч ким жок учурда 60 миң сомдук алтын буюмдарын жана 5 миң сомдук кол телефонун уурдап кеткенин айткан.

Бул факты Кылмыштардын жана жоруктардын бирдиктүү реестрине "уурдоо" беренеси менен катталган.Тергөөнүн жүрүшүндө жабырлануучулар 170 миң сомдук материалдык чыгым болушканы аныкталган. Ыкчам-иликтөө иштери жүргүзүлүп, натыйжада кылмышка шектүү катары Сузак районунун 1983-жылы туулган Н.А. жана анын шериги Жалал-Абад шаарынын тургуну 1991-жылы туулган И.Х. кармалышкан. Алар тергөөдө жасаган кылмыштары боюнча көрсөтмө беришип, убактылуу кармоочу жайга киргизилген.

Учурда шектүүлөрдүн башка кылмыш иштерине тиешеси бар же жоктугун аныктоо максатында тергөө амалдары жүргүзүлүүдө.

Автор: Айсалкын Качкынбекова