УКМК БеспределKG баракчасынын администраторунун кармалышы боюнча түшүндүрмө берди

УКМК "аймактар аралык касташууну козутуу" беренеси менен БеспределKG баракчасынын администратору кармалганын тастыктады. Бул тууралуу аталган комитеттин басма сөз кызматынан билдиришти.

"Администратор бир нече жолу аймактар аралык жаңжалды козутууга үндөгөн жалган жана провокациялык мүнөздөгү маалыматтарды тараткан. Ошондой эле жарандарды мыйзамсыз жана зордук-зомбулук иш аракеттерге түрткү кылып, колдонуучулар арасында каршы ойлорду, бири-бирин жек көрүү түрүндө аймактар аралык касташууну жараткан. Бул факты боюнча материалдар Кылмыштардын жана жоруктардын бирдиктүү реестрине катталып, сотко чейинки териштирүү жүрүүдө", - деп жазылат маалыматта.

Буга чейин аймактар аралык касташууну козутуу фактысы боюнча социалдык тармактын активдүү колдонуучусу кармалганын УКМК билдирген. Кармалган жаран БеспределKG баракчасынын администратору Автандил Жоробеков аттуу жаран болгон. Ал 2020-жылдын 24-январына чейин камакка алынган.

Автор: Айсалкын Качкынбекова