"Кумтөр" кенинде көчкүдөн кийин дайынсыз болуп жаткан 2 кызматкер 3 күндөн бери табыла элек

1-декабрь күнү таңга маал "Кумтөр" кениндеги Лысый жээк өрөөнүндө үйүлгөн жараксыз катмар көчүп түшкөн. Андан кийин ал жердеги 2 кызматкер дайынсыз болуп жаткан, аларды издөө иштери дароо башталган болчу. Эртеси дайынсыз болуп жаткандар "Кумтөр" кениндеги бульдозердин айдоочусу жана түнкү нөөмөттүн кезекчиси экендиги маалымдалган.

Кечээ өкмөт башчы аларды издөө иштерин күчөтүү тапшырмасын берген. ӨКМнын куткаруучулары менен компаниянын өзүнүн куткаруучулары биргеликте, жалпы 92 адам издөө иштерине тартылган. Алар издөөнү түнү да уланткан.

Бүгүн, 3-декабрда дайынсыз болуп жаткан 2 кызматкер табыла электигин "Кумтөрдүн" маалымат кызматынан кабарлады.

"Азырынча абалда өзгөрүү жок. Бирок ошол курам менен издөө иштери уланууда", - деди маалымат катчы.