ЖЫЛ ЖЫЙЫНТЫГЫ-2019: Кыргыз маданиятындагы орду толгус жоготуулар

2019-жылы кыргыз маданият чөйрөсү орду толгус чоң жоготууларга учурады. Жыл жыйынтыгын чыгарууда аларга да токтолууну чечтик.

2-январда Кыргыз Эл артисти, опера ырчысы, педагог Эсенбүбү Нурманбетова узакка созулган оорудан улам 62 жашында көз жумган.

Ага удаа эле Кыргыз Республикасынын Эмгек сиңирген артисти, балерина Асымкүл Баетова 76 жаш курагында дүйнө салган.

6-апрель Кыргыз Республикасынын Эмгек сиңирген артисти Жаркын Балыкбаева 77 жашында көпкө созулган бөйрөк оорусунан каза болгон.

Актриса "Апамдын махабаты", "Айыл өкмөтү", "Чиркин өмүр", "Белгисиз маршрут", "Боз салкын" жана башка тасмаларга тартылып, театрда бир топ образдарды жараткан.

29-апрелге караган түнү Кыргыз Эл артисти, театр жана кино актёру Сатыбалды Далбаев 85 жашында дүйнө салган.

Жайында кыргыз киносу дагы бир чоң жоготууга учураган. Кыргыз Республикасынын Эл артисти актёр, кинооператор Нуртай Борбиев 8-июнда 82 жаш курагында дүйнө салган. Ал "Ак илбирстин тукуму", "Сүйүү жаңырыгы", "Маңкурт" жана башка тасмаларга операторлук кылып, "Көчө", "Саманчынын жолу" тасмаларында роль ойногон.

Андан көп өтпөй Кыргыз Эл сүрөтчүсү, профессор Догдурбек Нургазиев дүйнө салган.

Ноябрь айында кыргыз маданиятына зор салым кошуп келаткан таланттардан удаасынан айрылдык. Кыргыздын кыйырына комуз өнөрү менен таанылган чебер комузчу Нурзат Орозалиева оорудан улам 10-ноябрда каза болду. Анын артында далай күүлөрү чертилбей калды.

Ага удаа эле кыргызга аттын кашкасындай таанымал төкмө акын Майра Керим кызынын уулу ырчы Акжолтой Канатбек уулу достору менен Кочкорго бараткан жолдо автокырсыкка кабылып каза болгон. Акжолтой менен унаада 2 ай мурун баш кошкон жубайы жана 3 досу болгон. Тилекке каршы, кырсыкка кабылгандардын баары көз жумган. Акжолтойдун ырдап чыгам деп жүргөн "Бегимай" аттуу ыры кыргыз элине белек болуп калды.

Ошол эле күнү аккордеон менен Чубак Сатаевдин, Арзыбек Бедияровдун ырларын мыкты деңгээлде аткарып, ийине жеткире ырдаган ырчы Талант Мамасалиев да автокырсыктан каза болгон.

13-ноябрга караган түнү Ош улуттук драма театрынын актрисасы Нурила Алимбаева узакка созулган оорудан улам 41 жашында каза болгон. Анын артында 2 жаштагы кызы калган.

Кесиптештеринин айтымында, Нурила айым төрөттөн кийин рак илдетине кабылганы билинип, ошол дарттын айынан каза болгон.

2019-жылы кыргыз киносу дагы бир чоң талантынан айрылды. "Караш-караш окуясы", "Ысык-Көлдүн кызгалдактары", "Асма көпүрө", "Ак кеме", "Бөрү зындан" жана башка кыргыз кереметин жараткан режиссёрлордун бири Болот Шамшиев 21-декабрь күнү 78 жаш курагында оорудан улам дүйнө салган.