"Жээнимди алгач Караколдон алып келген балдар колу бутун байлап зордукташкан" дейт 16 жаштагы сойкулукка мажбурланган кыздын таежеси

Аты-жөнүн атагысы келбеген 16 жаштагы кыздын таежеси "жээнимди 12-ноябрь күнү Ысык-Көл облусунун Каракол шаарынан бейтааныш 2 адам Бишкекке алып келип, андан соң күч колдонулуп, каалоосуна каршы притондо иштөөгө мажбурланган" деп билдирет. Анын айтымында, эки айдан бери шектүүлөр кармалбай келип, качан гана бул окуя коомчулукка тараганда гана шектүүлөр кармалганына нааразы. Ал Ленин РИИБинин башчысына эки жолу кирип, арыз менен кайрылган.

"Учурда жээнимдин абалы начар. Кечээ, 22-январда түнү менен РИИБде болуп, шектүү кыздар менен бетме-бет жолугуштук. Бирөөсү күнөөнү моюнга алып сабаганын айтса, экөө моюнга алган жок. Алар "бул кыз көчөдө жүрүп, бизге келгенине көп болду. Бизге эч кимим жок деп айткан. Ал телефон, акча уурдаган. Ошого карызын кутулуу үчүн иштеп жаткан", - деп бизди күйгүздү. Дагы жакшы, жээнимди ошол жерден өзүм куткарып чыгыпмын, болбосо булар көчөдөн келген кыз деп күнөөнү моюнга албай коюшмак экен.

Менин жээним Ак-Суу районунда окуп, картошка казып иштеп, апасы менен сиңдисине жардам берип келген. Ал башка жакка чыгып же бир жаман иштерди кылып көргөн кыз эмес. Мен бул окуя катталганга чейин эле алардын үйүнө барып келгем. Апасы да бир аз ооругандыктан, күнүмдүк оокатын картошка казып иштеп, жан баккан үй-бүлө.

Негизи бул жерде Каным деген аял бар. Анын күйөөсү жээнимди көбүрөөк сабаган. Мен милиция кызматкерлеринен Каным анын күйөөсүн жана Караколдон кызды алып келген эки эркек баланы кармап келип, камашын талап кылам. Себеби бул иштин башында ошолор турат. Кыздын денесинде зомбулуктун белгилери бар болчу. Андан бери көп убакыт өткөндүктөн, зомбулуктун издери тарап калды. Ал эми медициналык экспертиза деле көп нерселерди туура эмес чыгарды", - дейт кыздын таежеси.

Жабырлануучу өспүрүм аны Бишкекке алып келген кыз менен Ак-Суу районунан таанышкан.

"Ал кыз жээнимди туулган күнгө чакырымыш болуп, Каракол шаарындагы автобекеттен бир машинага салып кеткен. Ал ушундай жол менен Бишкекке келген. Андан соң аны сабап, камап, мажбурлап сойку катары иштете башташкан. Жээнимдин айтымында, аны алгач Караколдон алып келген эки бала буту, колун байлап зордукташкан. Ал ар бир келген кардарга ыйлап жардам сурачумун дейт. Кээ бирлери ага тийбечү экен. Бирок сен эмнеге ыйлайсын деп кайра аны сабачу экен. Жээнимди башка эле бир кызды издеп жүргөн балдар куткарганга жардам беришти. Алар беш-алтоо экен. Мындай жерлерге кардар болуп киришип, кызды издешиптир. Аларга да сиңдим кайрылып ыйлаганда, алар апасынын номерин алып сыртка чыгып байланышыптыр. Анан аталган жайга мен бардым. Барсам ал балдар жээнимди кайтарып турган экен, араң кирдик. Бир бөлмөнү ачсак 10дой кыз бар экен. Ошолордун арасынан менин жээним ыйлап чуркап чыкты. Биз милиция чакырдык эле, укук коргоо кызматкерлери келгенче баягы кыздар качып кетишти. Биз да таппай калдык. Биз жээнимди куткарып, анан бул чуу башталды", - деди ал.

Бүгүн, 23-январда Ленин райондук соту шектүүлөрдүн баш коргоо чарасын карап, аларды эки айга камакка алышты.