Жалал-Абад облусуна караштуу Сузак райондук социалдык өнүгүү башкармалыгынын үй-бүлөнү колдоо жана балдарды коргоо бөлүмүнүн башчысы Абдыкерим Мусаев Сузакта сабалып каза болгон 2 жашар наристе тууралуу SUPER.KG порталына төмөнкүлөрдү айтып берди.
"Наристени ата-энеси өздөрү эле багып жүргөн. Бирок 2019-жылдын февраль айында баланын апасы каза болуп калган. Андан соң наристени Ноокат районунда жашаган таенеси менен таятасы алып кетишкен. Октябрь айында каза болгон келиндин жолдошу ага жылдык өткөрүүгө келип, Ноокаттан баласын алып келген. Чарчап калган баланын 2014-жылы туулган эжеси дагы бар. Жылдыкты өткөрүп, бир тууган агасынын аялына балдарды таштап, өзү кайра Орусияга кеткен. Бирок атасы балдарын бир тууганына таштап жатканын айтып, тийиштүү кызматкерлерге маалымат дагы берген эмес.
Ушул жылдын 27-январында бала чарчап калган. Окуя катталган күнү жеңеси үйдө болгон эмес. Ал шаарга базарга кеткен. Наристени жана өзүнүн дагы кичине балдарын 2007-жылы туулган баласы карап калган. Наристе ошол убакта эсин жоготкон. Аны карап калган аялдын баласы коңшусуна "иним дем албай жатат" деп чуркап барган. Кошуна келип, балага эки кашык суу берген. Бирок ал бир кашык сууну ичип, экинчисин кыйналып жута албай койгон. Анан үйдүн ээсине телефон чалганда, ал базардан үйгө жетип калганын айткан. Ал келип эле өзү базардан келген такси менен баланы алып, ооруканага жөнөгөн. Дарыгерлердин маалыматы боюнча, бала ооруканага келгенге чейин эле каза болгон. Балким жолдо үзүлгөн.
Экспертизалар дайындалган. Жыйынтыгын күтүп жатабыз. Ошондой эле балада окуя болгон күндөн башка дагы денесинде көк ала тактар бар болгондуктан, биз бала мурда дагы кордукка кабылганбы деп жатабыз. Шектелип жаткан жеңеси сурак берген учурда биздин кызматкерлер дагы катышты. Наристенин атасы дагы Москвадан келди. Бирок атасы "Кудайдан көрөм" дегендей мамиле кылып, биз менен сүйлөшкөндөн дагы баш тартып жатат. Мындан улам чарчап калган баланын атасы жеңесин коргоп коюшу мүмкүн деген версия менен биздин бир кызматкерди каза болгон баланын мыйзамдуу өкүл катары каттоодон өткөрдүк. Тергөөчүдөн дагы аныктама чыкты. Азыр биздин кызматкерде баланын атасындай эле укуктары бар.
Шектелип жаткан аялдын дагы кичине балдары бар болгондуктан, анын баш коргоо чарасы каралып, үй камагына чыгарылды. Ал тергөөгө келип, кетип турат. Ал эми чарчап калган баланын бир тууган эжесин атасы Москвага алып кетем деп жатат. Анын өзүнүн эрки. Анткени ал Орусиянын жарандыгын алган. Ал эми апасы Сузак районунан каттодон чыгып, бирок ал Орусиянын жарандыгын алганга жетпей каза болуп калган экен", - деди Мусаев.
Окуянын чоо-жайы:
27-январь күнү болжол менен саат 13:30 чамасында Сузак районунун Октябрь айылдык ооруканасына 2017-жылы туулган баланын жансыз денесин алып келишкен. Анын денесинде көптөгөн көк ала тактар бар болгон. Бул факты боюнча окуя болгон жерге тергөө ыкчам тобу барган. Алар бардык тийиштүү маалыматтарды Сузак РИИБинин Кылмыштардын жана жоруктардын бирдиктүү реестрине "денеге оор залал келтирүү" беренеси менен каттап, сотко чейинки өндүрүш иши ачылган. Шектүү катары баланы карап жүргөн жеңеси Д.А. суралууда. Анын колунда кичинекей баласы жана андан сырткары өспүрүм балдары бар. Чарчап калган баланын атасы Орусияда иштеп жүргөн. Ал эми апасы 2019-жылы каза болуп калган.
Учурда даярдалган соттук-медициналык экспертизанын жыйынтыгы күтүлүүдө.
SUPER.KG порталы чарчап калган баланын жакындары бул окуя тууралуу өз версиясын айтып беришсе, жарыялоого даяр.
