Сооронбай Жээнбеков: "Ишкердиктин биз күткөндөй активдүүлүгү орун алган жок"

Мамлекет тарабынан жасалып жаткан арбын аракеттерге карабастан, региондорго инвестиция тартуу иши талаптагыдай болбой жатат. Бул тууралуу Өнөр жайды жана ишкердикти өнүктүрүү боюнча комитетинин экинчи жыйыны учурунда Кыргыз өлкөсүнүн президенти Сооронбай Жээнбеков айтты.

Айтымында, бул тармак күтүлгөн жыйынтыктарды бербей жатат.

"Ишкердиктин биз күткөндөй активдүүлүгү орун алган жок. Ишкерлер мунун негизги себеби катары - инвесторлордун кызыкчылыгын коргоонун чабалдыгын айтышууда. Бизнес ассоциациялары жана ишкерлер тарабынан келип түшкөн даттануулар бар.

Негизинен алар укук коргоо жана мамлекеттик текшерүүчү органдар кээде аша чаап, бизнестин иштөөсүнө негизсиз тоскоолдуктарды жаратканы айтылууда. Кээ бир учурда негизсиз оор чараларды колдонуп, ишкерлерди камакка алып жаткандыгы тууралуу кооптонуулар, кайрылуулар түшүп жатат", - деди Жээнбеков.

Өлкө башчы соттук процесстерде ишкерлердин жана инвесторлордун укугу толук корголбой жатканына токтолуп өттү. Мындан улам ал бүгүнкү жыйында бардык көйгөйлөрдү ачык айтып, тиешелүү чечимдерди сунуштоого чакырды.