Парламенттин тийиштүү комитети вице-премьерликке Акрам Мадумаровдун талапкерлигин жактырды

Жогорку Кеңештин тийиштүү комитетинде вице-премьер-министр кызматына Акрам Мадумаровдун талапкерлиги жабык эшик артында каралды. Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин регламенти боюнча комитет анын талапкерлигин колдоп, Жогорку Кеңештин кароосуна жөнөттү.

Буга чейин анын талапкерлигин Жогорку Кеңештин көпчүлүк коалициясы жактырган.

11-февралда вице-премьер Жеңиш Разаков берген арызынын негизинде кызматтан бошотулган. Тийиштүү жарлыкка президент Сооронбай Жээнбеков кол койгон. Разаков эки жылдан бери бул кызматты аркалап келген. Ал чек ара маселеси боюнча иш алып барган. Акрам Мадумаров учурда өкмөттүн Баткен облусундагы ыйгарым укуктуу өкүлү болуп эмгектенет.

Автор: Жылдыз Джускембаева