"Ош электр" ишканасынын кызматкерлери пара менен кармалды

"Ош электр" ишканасынын кызматкерлери пара менен кармалды. Бул тууралуу УКМКнын басма сөз кызматынан билдиришти.

Маалыматка ылайык, 19-февраль күнү УКМКнын кызматкерлери Ош шаарында жана Ош облусундагы энергетика тармагындагы коррупциялык көрүнүштөрдү алдын алуу багытында иш-чара жүргүзгөн.

Анын негизинде Ноокат райондук электр станциясынын жооптуу кызматкери С.М. жана "Ош электрди" текшерүү жана көзөмөлдөө бөлүмүнүн инспектору П.А. 50 миң сом пара алып жаткан учурунда кармалды. Аталган кызматкерлер Ноокат районунун жашоочусу Т.Б. электр энергиясын уурдаган деп андан 283 миң сом өлчөмүндө пара талап кылышкан.

Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган. Учурда тергөө жүрүп жатат.

Автор: Айсалкын Качкынбекова