Укук коргоочу Азиза Абдирасулова: "Кашкар Жунушалиевдин отставкага кетишине негиз бар". КҮНСОБОЛ

8-мартта аялдардын зомбулукка каршы маршка катышкан активист аялдарды милиция кызматкерлери кууп таркатып, айрымдарын кармап кетишкен. Бул көрүнүш коомчулукта талкууга алынып, айрымдары укук коргоо органдарынын кызматкерлерин сындашса, кээ бирлери маршка катышкан аялдарды сындап жатышат. Ошол эле учурда ички иштер министри Кашкар Жунушалиевдин отставкасын талап кылгандар дагы бар. Бүгүн Утурумдук өкмөттүн төрайымы Роза Отунбаева Кашкар Жунушалиев кызматтан кетиши керектигин айтты.

Мындан улам SUPER.KG порталы "8-мартта маршка чыккан аялдарды милиция кызматкерлери кармап кетти. Мындан улам ички иштер министри Кашкар Жунушалиевдин кызматтан кетүүсү талап кылынууда. Кашкар Жунушалиевдин отставкага кетүүсүнө негиз барбы?" деген собол салды.

Укук коргоочу Азиза Абдирасулова Жунушалиев тынч маанайдагы митингдер жөнүндө мыйзамды аткарган жок деген ойдо.

"Ички иштер министринин отставкага кетишине негиз бар. Себеби Жунушалиев тынч маанайдагы митингдер жөнүндө мыйзамды аткарган жок. Мыйзамды, Конституциянын нормасын одоно бузду. Ак калпакчан, бет кап кийип аялдарды ур-токмокко алгандарды милиция кызматкерлери кармаган жок. Ошондуктан бул жерде Кашкар Жунушалиев милдетин аткарган эмес. Майрам күнү болгондуктан Свердлов РИИБинин башчысы дагы караш керек болчу. Бийлик менен карапайым элдин карама-каршылыгы күчөгөндө жергиликтүү бийлик атайын эл менен милиция кызматкерлерин кайраштырып коёт", - дейт Абдирасулова.

Автор: Жылдыз Джускембаева