Ош облусунун Өзгөн районунда 5 миң долларга баласын сатууга аракет кылган эки эненин иши тергелип бүттү

Ош облусунун Өзгөн районунда 5 миң долларга баласын сатууга аракет кылган эки эненин иши тергелип бүттү. Бул тууралуу Ош ОИИБинин басма сөз кызматынан билдиришти.

ОИИБинин басма сөз кызматкери бул иш бир же эки күндө сотко өткөрүлөрүн кошумчалады.

Окуянын чоо-жайы:

20-январь күнү Ош облусунун Өзгөн районундагы төрөт үйүндө кебетеси азиялык болгон аял өзүнүн жаңы төрөлгөн ымыркайын сатып, пайда көрүүнү көздөп жаткандыгы тууралуу маалымат келип түшкөн. Анда Өзгөн районундагы төрөт үйүндө 23 жаштагы аял эркек бала төрөгөн. Ал баланы сатууну пландап, ага мурда сот жообуна тартылган 45 жаштагы А.Э. аттуу аяш энеси көмөктөшүп, аял ымыркайды 5 миң долларга соодалашып сатып жаткан учурда кармалган. Тергөө амалдары жүргүзүлүп, шектүүлөр убактылуу кармоочу жайга киргизилген. Алардын баш коргоо чарасы каралып, ымыркайдын энеси К. кызы К. ден соолугуна байланыштуу үй камагына чыгарылган. Ал эми ортомчу болгон А.Э. эки айга камакка алынган.

Автор: Айсалкын Качкынбекова